Bıyl 8 aıda kórsetilgen 156 539 stomatologııalyq qyzmet úshin Áleýmettik medısınalyq saqtandyrý qory 266 mln teńge tóledi. 2020 jylǵy 1 qyrkúıektegi jaǵdaı boıynsha Nur-Sultan qalasynda 21 jetkizýshi stomatologııalyq qyzmet kórsetedi. Onyń ishinde, memlekettik – 11, jekemenshik klınıkalar – 10. Bıyl qor jetkizýshileriniń sany 2019 jylmen salystyrǵanda biraz ósti, ótken jyly 1 memlekettik jáne 4 jekemenshik klınıka, barlyǵy 5 jetkizýshi stomatologııalyq kómek kórsetken bolatyn», dep habarlaıdy «Áleýmettik medısınalyq saqtandyrý qory» KeAQ Nur-Sultan qalasy boıynsha fılıalynyń baspasóz qyzmeti.
MÁMS júıesinde josparly stomatologııalyq kómek 18 jasqa deıingi balalar men júkti áıelderge tegin kórsetiledi. Shuǵyl stomatologııalyq kómekti 18 jasqa deıingi balalar, júkti áıelder, Uly Otan soǵysynyń ardagerleri, I, II, III toptaǵy múgedekter, «Altyn alqa», «Kúmis alqa» alqalarymen marapattalǵan kópbalaly analar, ataýly áleýmettik kómek alýshylar, jasy boıynsha zeınetkerler, áleýmettik máni bar aýrýlarmen aýyratyndar, múgedek balaǵa kútim jasaıtyn jumys istemeıtin adamdar, bala kezinen birinshi toptaǵy múgedekke kútim jasaıtyn jumys istemeıtin adamdar ala alady.
Ortodontııalyq kómek jaqsúıek-bet anomalııalaryn joıýǵa arnalǵan apparatty paıdalana otyryp, jaqsúıek-bet aımaǵynyń týa bitken patologııasy bar 18 jasqa deıingi balalarǵa kórsetiledi.
Sondaı-aq bıyldan bastap Áleýmettik medısınalyq saqtandyrý qory MÁMS paketi boıynsha áleýmettik qorǵalmaǵan otbasylardan shyqqan balalardy – ataýly áleýmettik kómek alýshylardy qoldaýdy qarastyrǵan. 6 jastan 12 jasqa deıingi balalarǵa túrli jaqsúıek-bet aımaǵynyń aýytqýlary (tistem buzylýlary, jaqtyń mıkrognotııasy) kezinde ortodontııalyq kómek kórsetiletin bolady.
«Elordada tegin stomatologııalyq kómek alýǵa quqyly pasıent emhanaǵa da, stomatologııalyq klınıkaǵa da júgine alady. Bul rette stomatologııalyq qyzmet kórsetetin klınıka qordyń áleýetti qyzmet jetkizýshisi jáne áleýetti qyzmet jetkizýshiler tiziliminde bolýy mańyzdy. Shuǵyl jáne josparly stomatologııalyq kómek kórsetý pasıenttiń erkin tańdaýy negizinde júzege asyrylady (bala – ata-ana nemese zańdy ókil bolǵan jaǵdaıda) jáne pasıenttiń tirkelgen jeri boıynsha ýchaskelik dárigerdiń joldamasynyń bolýy talap etilmeıdi. Qyzmet kórsetý faktisi jáne stomatologııalyq kómek kólemi aqparattyq júıede tirkeledi, bul alǵashqy medısınalyq-sanıtarlyq kómek uıymy men stomatologııalyq klınıkalar arasynda birlesip oryndaý shartyn jasasýǵa negiz bolady, ol aqparattyq júıede avtomatty túrde qalyptastyrylady», dep túsindiredi «Áleýmettik medısınalyq saqtandyrý qory» KeAQ Nur-Sultan qalasy boıynsha fılıalynyń baspasóz qyzmeti.
Kórsetilgen qyzmetterge aqy tóleý pasıenttiń tirkelgen jeri boıynsha alǵashqy medısınalyq-sanıtarlyq kómek kórsetý uıymy (emhana) arqyly júrgiziledi. Kórsetilgen qyzmetter naqty qyzmet kórsetý deregi (fakt) boıynsha aqparattyq júıege engiziledi. Medısınalyq kómek kórsetýden bas tartqan jaǵdaıda, áleýmettik medısınalyq saqtandyrý qoryna Qoldau 24/7 mobıldik qosymshasy arqyly júginý qajet, qosymshany Play Market jáne App Store arqyly ornatýǵa bolady.