Jambyldyq turǵyn Vıktorııa Mıhaılova óziniń on jasar nemeresi Konstantınniń armany týraly Jambyl oblystyq Polısııa departamentiniń Instagram áleýmettik paraqshasyna jazba qaldyrǵan. Ájesi óz jazbasynda nemeresiniń Polısııa departamenti boıynsha ekskýrsııa uıymdastyrǵysy keletinin, tipti departament bastyǵymen kezdesýdi qalaıtynyn aıtqan, dep habarlaıdy Egemen.kz.
Ájeniń ótinishi men balanyń tilegin eskergen oblystyq Polısııa departamentiniń bastyǵy, polısııa general-maıory Janat Súleımenov óziniń jumys kabınetinde Konstantınmen kezdesti.
Ájesimen birge Polısııa departamentine kelgen bala generalǵa óziniń oqýdaǵy jetistikteri, shahmatqa áýestigi men tańdaǵan bolashaq mamandyǵy týraly aıtyp berdi. Konstantın úlgili oqýshy bolýmen qatar, «Aqbota», «Ponı», «Rýsskıı medvejonok» jáne «Kengýrý» sekildi zııatkerlik konkýrstardyń júldegeri atanǵan.
Sondaı-aq, on jasar bala udaıy patrýldik polısııa kólikterin erekshe qyzyǵýshylyqpen baqylap otyrady eken. Polıseılerdiń jumysy týraly múmkindiginshe kóp bilgisi keletinin aıtqan Konstantınge general-maıor Janat Súleımenov departamenttiń mýzeıinde bolyp, ishki ister organdarynyń qalyptasý tarıhymen tanysýdy usyndy. Budan keıin Konstantın Taraz qalasyndaǵy Jedel basqarý ortalyǵynda bolyp, úlken ekrannan búkil qalanyń kórinisin tamashalady.
Kezdesý sońynda Janat Súleımenov Konstantınge myqty densaýlyqpen oqýda tabys tilep, Qazaqstan Respýblıkasy Ishki ister mınıstrliginiń emblemasy bar qolsaǵat syılady. Al, balanyń ájesi Vıktorııa Mıhaılova oblystyń bas polıseıine jyly qabyldaýy úshin alǵysyn bildirip, bul kezdesý nemeresiniń jadynda uzaq jyldar boıy saqtalatynyn aıtty.
Jambyl oblysy