Eńbek jáne halyqty áleýmettik qorǵaý mınıstri Birjan Nurymbetov, Ortalyq kommýnıkasııalar qyzmetindegi baspasóz máslıhatynda, Memleket basshysynyń 2020 jylǵy 1 qyrkúıekte Qazaqstan halqyna Joldaýynda bergen tapsyrmalaryn oryndaý barysyn aıtty, dep habarlaıdy Egemen.kz.
Mınıstr óz sóziniń basynda atap ótkendeı, Memleket basshysy Joldaýda aıtqan tapsyrmalardyń ishinde, zeınetaqy jınaqtaryn belgili bir maqsattarǵa qoldaný máselesi halyq arasynda ózekti bolyp tur.
«Memleket basshysynyń tapsyrmasy boıynsha Úkimet Ulttyq bankpen birge zeınetaqy jınaqtarynyń bir bóligin turǵyn úı jaǵdaıyn jaqsartý, qymbat turatyn em aqysyn tóleý nemese jekemenshik basqarýshy kompanııalarǵa basqarýǵa berý úshin paıdalaný tásilderin ázirledi. Tıisti tásilderdi Memleket basshysy maquldady. Olardy iske asyrý maqsatynda aǵymdaǵy jyldyń sońyna deıin qabyldaý josparlanyp otyrǵan «Qazaqstan Respýblıkasynyń keıbir zańnamalyq aktilerine ekonomıkalyq ósimdi qalpyna keltirý máseleleri boıynsha ózgerister men tolyqtyrýlar engizý týraly» zań jobasy aıasynda zańnamaǵa tıisti túzetýler daıyndaldy», – dedi Birjan Nurymbetov.
EHÁQM basshysy naqtylaǵandaı, zeınetaqy jınaqtaryn sáıkes maqsattarǵa qoldaý quqyǵyn kelesi azamattar sanaty paıdalana alady:
- jumys isteıtin, jasy boıynsha «jetkiliktilik sheginen» asatyn zeınetaqy jınaǵynyń qoljetimdi kólemi bar azamattar (bolashaq jumys kezeńi men júıeli túrde zeınetaqy jarnalaryn tóleýdi eskere otyryp, zeınetkerlik jasqa jetkennen keıin eń tómengi zeınetaqydan tómen emes deńgeıde zeınetaqy tólemderin qamtamasyz etýge jetkilikti zeınetaqy jınaǵynyń mólsheri);
- saqtandyrý kompanııalarymen eń tómengi zeınetaqydan tómen emes mólsherde ómir boıy annýıtettik tólemdi qamtamasyz etetin zeınetaqy annýıteti shartyna otyrǵan tulǵalar – BJZQ-da qalǵan zeınetaqy jınaǵy somasy sheginde (shamamen);
- zeınetke shyqqan azamattar (onyń ishinde kúshtik qurylymdar qatarynan) - BJZQ-da qalǵan zeınetaqy qarajatynyń 50%-nan aspaıtyn shekte. Eger olardyń zeınetaqylarynyń jıyntyq mólsheri (jasyna nemese eńbek ótiline baılanysty zeınetaqyny, bazalyq zeınetaqyny jáne zeınetaqy jınaǵynan tólemderdi qosa alǵanda) joǵalǵan tabysty halyqaralyq standarttarǵa sáıkes keletin deńgeıde almastyrýdy qamtamasyz etse (keminde 40%).
Sondaı-aq, Memleket basshysy, Áleýmettik qamsyzdandyrý kodeksin ázirleý jáne qabyldaý arqyly áleýmettik zańnamany shoǵyrlandyrý jónindegi jumysty bastaýdy tapsyrdy.
Osyǵan oraı, Birjan Nurymbetov, qazirgi kezde respýblıka azamattaryna 17 zańmen jáne 100-den astam zań aıasyndaǵy aktilermen retteletin áleýmettik qamsyzdandyrý sharalary keń kólemde qamtamasyz etilip otyrǵanyn atap ótti. Sonymen birge, áleýmettik kórsetkishter salasyndaǵy tólemder mólsherin esepteý úshin ártúrli kórsetkishter negiz bolýda: aılyq eseptik kórsetkish, kúnkóris deńgeıi, eń tómengi jalaqy jáne taǵy basqa.
«Áleýmettik qamsyzdandyrý salasyndaǵy zańnama qabyldaýǵa jeńil bolatyndaı jáne ony sapalyq turǵyda jaqsartý maqsatynda, biryńǵaı Kodekske biriktiriledi. Onyń tujyrymdamasy 2021 jyldyń 2-toqsanynda ázirlenedi, sodan keıin onyń negizinde Áleýmettik qamsyzdandyrý kodeksiniń ózin ázirleý bastalady. Bul óte mańyzdy qujat. Sondyqtan onymen jumys jasaý qoǵammen keń talqylaýdy qajet etedi, ıaǵnı biz barlyq usynystardy qabyldap, qarastyratyn bolamyz», – dedi EHÁQM basshysy.
Sonymen birge mınıstr Kodeksti ázirleý kezinde áleýmettik qamsyzdandyrý salasyndaǵy qoldanystaǵy zańdar jaı biriktirilip qoımaı, tutastaı alǵanda áleýmettik qoldaý sharalary júıelenetindigin, áleýmettik qamsyzdandyrý salasyndaǵy tólemder mólsherin biryńǵaı áleýmettik kórsetkishke (standartqa) baılanystyrý jáne basqa da máseleler qarastyrylatyndyǵyn túsindirdi.
Sonymen qatar Memleket basshysy, óziniń Qazaqstan halqyna Joldaýynda azamattardyń «elektrondy ámııanyn» engizý arqyly áleýmettik tólemderdi sıfrlandyrý boıynsha sharalar qabyldaýdy tapsyrdy.
Birjan Nurymbetov atap ótkendeı, búgingi tańda áleýmettik tólemderdi taǵaıyndaý kezinde IBAN kartochkalyq shoty qajet. Ony ashý úshin bankke barý kerek. Al bul áleýmettik tólem alýshylarǵa qosymsha yńǵaısyzdyqtar týǵyzady.
«Áleýmettik kómekti alýdy jeńildetý úshin Eńbek jáne halyqty áleýmettik qorǵaý mınıstrligi JSN arqyly ádepkideı ashylatyn «elektrondyq ámııanǵa» áleýmettik tólemderdi taǵaıyndaý máselesin qarastyrýda. Osy oraıda alýshy banktik kartaǵa aýdarý ádisin ózgerte alady. Qarjynyń saqtalýyn qamtamasyz etý úshin ámııanda QR Ulttyq bankiniń elektrondy aqshasyn paıdalaný usynylady», – dedi mınıstr.
Budan tys, ámııanǵa qol jetkizýge, onyń teńgerimin bilýge jáne taýarlar, jumystar nemese qyzmetter úshin tólemderdi shtrıh-QR kodty qoldanyp, eshqandaı komıssııasyz júzege asyrýǵa múmkindik beretin arnaıy uıaly qosymsha jasalady.