Senat depýtattary parlamenttik tyńdaýǵa daıyndyq aıasynda "Atameken" ulttyq palatasynyń ókilderimen jáne kásipkerlermen kezdesti, dep habarlaıdy Egemen.kz Parlament Senatynyń baspasóz qyzmetine silteme jasap.
Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekov sóz alyp, shaǵyn jáne orta bıznesti qoldaý men damytýǵa arnalǵan zańnama boıynsha jumystar atqarylyp jatqany týraly habardar etti. Sondyqtan parlamentshiler úshin kásipkerlerdiń damýǵa kedergi keltirip otyrǵan problemalaryn anyqtaý óte mańyzdy bolyp otyr.
Qazirgi kezde koronavırýs pandemııasy kezeńinde 430 myń kásiporynnyń qyzmeti toqtap qaldy. Olar bir jarym mıllıonnan astam qyzmetkerdi aqysyz demalysqa jiberýge májbúr boldy.
Karantın erejeleri jeńildegen tusta meıramhana, murajaılar men teatrlarǵa óz qyzmetin qalpyna keltirýge ruqsat berilgenine qaramastan, kınoteatrlar, oıyn-saýyq oryndary men fýd-korttar áli de kelýshiler úshin jabyq. Demek, bıznestiń keıbir baǵyttary shyǵynǵa batyp otyr. Kásipkerler bıznes qaýymdastyǵy ázirlegen jospardy tanystyrdy. Onda barlyq sanıtarlyq normalardy eskere otyryp, lokdaýnnan shyǵý barysy kórsetilgen. Senatorlar óz kezeginde kásipkerlerge barynsha kómek kórsetýge daıyn ekenin jetkizdi.
"Biz eldiń bas sanıtarlyq dárigerine shaǵyn jáne orta bıznes jumysyna qoıylatyn barlyq epıdemıologııalyq talaptar kórsetilgen normatıvtik quqyqtyq akti shyǵarýdy usynamyz. Onyń bári talaptar buzylǵan jaǵdaıda, kinálilerdi izdeýge kúsh salmaı, bıznes ókilderiniń qatelikterin anyqtaý úshin qajet", dedi senator Dáýren Ádilbekov.
Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekov Memleket basshysynyń Joldaýynda shaǵyn jáne orta bıznesti damytý jónindegi jumystyń negizgi nátıjesi JIО́-degi úlesti 2025 jylǵa deıin 35%-ǵa deıin, al bızneste jumyspen qamtylǵan qazaqstandyqtardyń sanyn 4 mıllıon adamǵa deıin arttyrý kerek degenin eske saldy.