Almatyda kásipqoı bokstan halyqaralyq týrnır ótti. «Nev Names» pen «Daryn» promoýterlik kompanııalary uıymdastyrǵan jarysty tamashalaý úshin Máskeý Olımpıadasynyń kúmis júldegeri Vıktor Demıanenko, KSRO kýbogynyń qola júldegeri Bolat Mankenov, kóptegen dúbirli dodalarda daralanǵan Serik Eshmaǵambetov pen Janqosh Turarov, aýyr atletıkadan álem chempıonatynyń eki dúrkin kúmis júldegeri Almas О́teshov syndy sańlaqtar «Abylaı han» sport keshenine arnaıy at basyn burdy.
Keshtiń basty jekpe-jeginde daryndy jas boksshylarymyzdyń biri Eskendir Harsan belarýssııalyq Andreı Nýrchınskımen kúsh synasty. Sharshy alańda 50 kezdesý ótkizip úlgergen 31 jastaǵy saqa sportshyǵa qarsy durys taktıka qoldana bilgen Saǵatbek Musahanovtyń shákirti bul básekede upaı sanymen jeńiske jetti. Bul Eskendirdiń kásipqoılar arasyndaǵy segizinshi jekpe-jegi. Sonyń jeteýinde ol jeńiske jetti.
– Jýyrda ǵana tusaýy kesilgen «Daryn» promoýterlik kompanııasy alǵash ret osyndaı halyqaralyq deńgeıde jarys uıymdastyryp otyr. Bizdiń basty maqsatymyz – osy sport túrin tańdaǵan jastarǵa jol ashý, olardyń úlken arenaǵa shyǵýyna barynsha jaǵdaı jasaý. Sóz oraıy kelgende, bul bastamaǵa jan-jaqty qoldaý kórsetken respýblıkalyq kásipqoı boks federasııasyna, «Nev Names» kompanııasyna, «Abylaı han» sport klýbyna, Shyǵys Qazaqstan oblysy Jarma aýdanyna qarasty Kóshek aýylynyń azamattaryna jáne jeke kásipkerler – Gúlnar Jaýynshynova men Gamza Geıdarovqa zor alǵysymyzdy bildiremiz. Buıyrtsa, aldaǵý ýaqytta da aıtýly týrnır óz jalǵasyn tabady, – deıdi «Daryn» promoýterlik kompanııasynyń prezıdenti Darhan Qabylanbaev.
Qazaqstan Respýblıkasyna eńbek sińirgen jattyqtyrýshy Dastan Sádýaqasovtyń úsh birdeı shákirti sol keshte rınge kóterildi. Úsheýi de qarsylastaryn sulatyp saldy. Atap aıtsaq, Bekbolat Quramysov Batyrjan Tuhtaevty úshinshi raýndta uryp jyqty. Bul nátıje eshkimdi tańdandyra qoıǵan joq. Sebebi, Bekbolattyń esimi jankúıerlerge jaqsy tanys. Ol – stýdentter arasynda álem jáne Azııa birinshilikteriniń júldegeri, Qazaqstan chempıonatynda jeńis tuǵyryna kóterilip, Dúnıejúzilik boks serııasy dodasynda birer jyl «Astana arlandarynyń» namysyn qorǵady. Alǵashqy raýndtarda Batyrjan oǵan laıyqty qarsylyq kórsetkenine qaramastan báseke bel ortadan aýǵan tusta Bekbolat qarqynyn kúrt kúsheıtti. Birneshe aýyr soqqylar daryǵannan keıin qarsy jaqtyń bapkerleri rıngke aq oramal tastaýǵa májbúr boldy.
Jas daryn Baýyrjan Beıildınov Erlan Mahmudtyń osal ońaı tusyn tapty. Boıy men qolynyń uzyndaǵyn utymdy paıdalanǵan ol qarsylasyna bas kótertpedi. Tóreshiler básekeni ekinshi raýndta toqtatty. Al Dáýit Yntymaq Qanat Súmebaıulynan aılasyn asyrdy. Bul aıtýly bylǵary qolǵap sheberleriniń kásipqoı rıngtegi tusaýkeser kezdesýleri. Sondaı-aq, aıtýly týrnırde Ǵanı Spataev ázirbaıjandyq Ismat Eıýnýlaeevty jáne Adlan Selmurzaev belarýssııalyq Sergeı Krapshılany jeńip, jergilikti jankúıerlerdi bir jelpindirip tastady.