Nurseıit Nııazbekov Eýropaǵa qazaqy qalpymen de tanylǵan azamat
Elbasynyń sarabdal saıasatymen ýaqyt talabyna saı bilim nárimen sýsyndaýǵa talpynǵan talantty jastarǵa jarqyn jol ashqan «Bolashaq» memlekettik baǵdarlamasy ómirsheńdigin kórsetkeni aqıqat. Nátıjesiniń nárliligi hám máýeligi sol – órkenıetti elderge baryp, sapaly bilim alýmen shektelmeı, tórtkúl dúnıedegi júzden astam ult ókilderiniń quddy sútiniń betine shyqqan qaımaǵyndaı iriktelip qatarlaryna qosylǵan jas óskinderdiń aldyńǵy shebinde qazaq balalarynyń júrgenin estigen jan qýanatyny da, súısinetini de ras.
Nurseıit Nııazbekov Eýropaǵa qazaqy qalpymen de tanylǵan azamat
Elbasynyń sarabdal saıasatymen ýaqyt talabyna saı bilim nárimen sýsyndaýǵa talpynǵan talantty jastarǵa jarqyn jol ashqan «Bolashaq» memlekettik baǵdarlamasy ómirsheńdigin kórsetkeni aqıqat. Nátıjesiniń nárliligi hám máýeligi sol – órkenıetti elderge baryp, sapaly bilim alýmen shektelmeı, tórtkúl dúnıedegi júzden astam ult ókilderiniń quddy sútiniń betine shyqqan qaımaǵyndaı iriktelip qatarlaryna qosylǵan jas óskinderdiń aldyńǵy shebinde qazaq balalarynyń júrgenin estigen jan qýanatyny da, súısinetini de ras.
Osy lekte Almaty oblysy Qaratal aýdanynan shyqqan Nurseıit Nııazbekovtiń de qadamy qutty boldy. Qutty deıtinimiz, ol Úshtóbedegi orta mektep qabyrǵasynan shyqqan soń, Anglııanyń Oksford ýnıversıtetiniń saıasattaný jáne halyqaralyq qatynastar fakýltetine 2007 jyly oqýǵa túsip, aıdy aspannan bir-aq shyǵarǵanyna kúlli aımaq qýana shattandy. Qazaqtyń asyl azamaty, ózindik ustanymy bar, qaıyspas qaısarlyǵyn, kózdegen maqsatyna jetpeı toqtalmaıtyndyǵyn dáleldep, atalǵan oqý ornyn 2010 jyly támamdady.
Ásili, bilim alý ınemen qudyq qazǵandaı, dep qazaq beker aıtpaǵan. Osynaý qazaqy danalyqqa sol qazaqtyń uly danyshpany, oıshyl aqyny Abaıdyń «Talap, eńbek, tereń oı, qanaǵat, raqym oılap qoı. Bes asyl is kónseńiz» degen kóregendigine kóńil túkpirinen oryn bergen Nurseıit Máketuly 004-2005 jyldary Oksford ýnıversıtetiniń áleýmettaný fakýltetiniń áleýmettaný magıstri mamandyǵyn oqyp alǵany taǵy bar. Al 2000-2004 jyldary Qazaqstan menedjment, ekonomıka jáne boljaý ınstıtýtynyń saıasattaný jáne halyqaralyq qatynastar bakalavry mamandyǵyn meńgerdi. Bile bilsek, bul Taldyqorǵan óńirinen shyqqan qazaqtyń qarapaıym balasynyń bilimge degen qushtarlyǵyn ańǵartary anyq.
Endi bizdiń keıipkerimizdiń eńbek jolyna kóz júgirtsek, 2013 jyldyń qyrkúıek aıynan beri T.Rysqulov atyndaǵy Qazaq ekonomıkalyq ýnıversıteti, halyqaralyq bilim berý baǵdarlamasy, áleýmettik-ekonomıkalyq tártip kafedrasyna qyzmetke turady. Atalǵan oqý ornynyń talabyna oraı, stýdentterdi menedjment mamandyǵy boıynsha edvaızerlikke daıyndaý sekildi ýaqyt suranysyn múltiksiz atqarady. «О́mirlik isti bilsem, bilgen ústine bile tússem jáne órkenıetti elderdegideı tek ózim ǵana bilýmen shektelmeı, sol bilgenimdi shapaǵat nuryndaı aınalama shasha júrsem», degendi ustanymyna aınaldyrǵany oı ólsheminiń bıiktigin kórsetedi.
Erekshe aıta keter bir jaıt, Nurseıit Nııazbekov «Bolashaq» memlekettik baǵdarlamasy boıynsha, Anglııada oqyp kelgen soń, joǵary bilim berý uıymynyń joldamasymen 2006 jyly mamyr aıynda Qazaq menedjment, ekonomıka jáne boljaý ınstıtýtyna áleýmettaný, halyqaralyq qatynastar jáne ǵylymı-zertteý ádiskeri mamandyǵy boıynsha oqytýshy bolyp qyzmetke ornalasyp, sol laýazymdy búgingi kúnge deıin joǵary deńgeıde atqaryp keledi.
Qazaq-brıtan tehnıkalyq ýnıversıteti, Halyqaralyq ekonomıka mektebinde de saıasattaný jáne áleýmettaný muǵalimi qyzmetine de joǵaryda atalǵan joǵary oqý ornynyń joldamasymen ornalasyp, qosymsha qyzmet atqarýda. Álbette, bul – Nurseıit Nııazbekovke artylǵan senim. Sol senimge selkeý túsirmeýdi ol óziniń azamattyq paryzy sanaıdy.
2008 jyldyń qyrkúıek aıy men 2009 jyldyń aqpan aıy aralyǵynda Ál-Farabı atyndaǵy Qazaq ulttyq ýnıversıtetinde saıasattaný jáne halyqaralyq qatynastar muǵalimi bolyp dáris bergeni bar. Sondaı-aq, Erıst End Iаng Qazaqstan uıymynda marketıng boıynsha menedjer assıstenti bolyp 2005-2006 jyldary jumys istedi. Kásibı bilim berý boıynsha Haıfab AB (HIFAB AB), «Qazaqstandaǵy orta jáne shaǵyn bıznesti damytýǵa baılanysty trenıng pen kásibı bilim berý» jobasyn jasady.
«Bolashaq» baǵdarlamasynyń bir túlegi Nurseıit Nııazbekovtiń izdenimpazdyǵy tek qana oqýmen shektelmeı, shetelde alǵan bilimin óz elimizde tájirıbeden ótkizý arqyly bıik belesterge bet alǵandyǵyn dáıekteıdi.
Nurseıit Nııazbekov qazaq, orys, aǵylshyn tilderin – oqý, sóıleý, jazý arnaıy leksıka synaqtary boıynsha tek «5» degen baǵa ıegeri. Túrik tilinen de habary mol. Bul ekiniń birine buıyrmaǵan baqyt desek te artyq emes. Nurseıit Máketulynyń Microsoft Office, Outlook Express, Mozilla Firefox, Adobe Photoshop, Corel DRAW atty kompıýterlik baǵdarlamalardy da jetik meńgergenin basa aıtqan lázim. Ras, bul bálendeı jańalyq emes, biraq leıtenant shenindegi ofıser Nurseıit Nııazbekovtiń taǵy bir qyry edi.
«Nııazbekovke Oksford ýnıversıtetinde áleýmettaný salasynyń magıstratýra baǵdarlamasy boıynsha oqyp júrgen kezinde ǵylymı jetekshi boldym. Men odan úlken úmit kúttim. Ol salmaqty jáne belsendi stýdent boldy. Ásirese, Qazaqstannyń keńestik dáýir kezeńindegi saılaýshylar áreketi týraly dıssertasııa jazǵany meni tańǵaldyrdy. Ol jan-jaqty zertteý júrgize otyryp, óziniń kún tártibin qatań saqtady. Menińshe, Nurseıit Oksford ýnıversıtetinde ótkizgen jylyn joǵary deńgeıde paıdalana bildi. Ol óte aqyldy, isker jáne jumysty shyǵarmashylyq pen salmaqty meńgere biledi. Onyń syrtynda, Nurseıit Máketuly adamdarmen tez til tabysa alady. Qandaı qyzmetti bolsa da kásibı turǵyda minsiz ári óz Otanyna adal atqaratynyna men senimdimin», – deıdi Oksford ýnıversıteti áleýmettaný fakýltetiniń dekany Kolın Mıls.
Qoryta aıtqanda, «Bolashaq» memlekettik baǵdarlamasynyń bir túleginiń jetken jetistigi osyndaı. Olardy Otanymyzdyń aqyl-oı baılyǵy dep baǵalaǵan jón.
Nurbol ÁLDIBAEV,
«Egemen Qazaqstan».
Almaty oblysy.