Orta salmaqtaǵy qazaqstandyq kásipqoı boksshy Jánibek Álimhanuly óziniń kezekti jekpe-jegin ótkizip, argentınalyq qarsylasyn ekinshi raýndta sulatyp saldy.
AQSh-tyń Las-Vegas qalasyndaǵy (Nevada shtaty) The Bubble sport kesheninde ótken kezdesý 10 raýndqa josparlanǵan bolatyn. Alaıda argentınalyq boksshy Gonsalo Korııý (16-3, 6 KO) jerlesimizdiń joıqyn qımylyna tótep bere almaı, ekinshi raýndta Jánibektiń aýyr soqqysynan keıin jekpe-jekti ári qaraı jalǵastyra almady. Birinshi raýndta Jánibek qarsylasyn bir ret nokdaýnǵa túsirgenin de aıta keteıik.
Muhıttyń arǵy betinde judyryqtasyp júrgen Jánibek Álimhanuly osymen kásipqoı boksta toǵyzynshy márte jeńiske jetip, besinshi kezdesýin merziminen buryn aıaqtady. Bul jeńisinen keıin ol orta salmaqtaǵy álemdik reıtıngte 7 saty joǵarylap, 23-orynǵa turaqtady.