Mánshúktiń músini ornatyldy

Ǵasyrǵa jýyq ýaqyt boıy óńi­rimizdegi barlyq emhanalar men aýrýhanalarǵa orta jáne kishi me­dısına qyzmetkerlerin daıarlap kele jatqan oqý ornynyń 85 jyldyǵymen ardager dárigerler, máslıhat depýtattary quttyqtap keldi. Mánshúk músininiń ashylý saltanatynda jurtshylyqty Al­ma­tydan Mánshúk Mámetovanyń ne­mere týysy Sholpan Mámetova men Reseıdiń Pskov oblysy Nevel aýda­nynyń dene shynyqtyrý jáne sport basqarmasynyń bastyǵy Ele­na Voronkova onlaın-formatta qut­tyqtady.

1935 jyly ashylǵan Aqtóbe medısına ýchılıshesi qabyrǵasynda osy kezge deıin 20 myńnan astam maman daıar­lanǵan. О́ńirdegi irgeli oqý ornyn quttyqtap kelgen oblys ákimi Ońdasyn Orazalın adam ómirin qutqarýda orta jáne kishi medısına qyzmetkerleriniń eńbeginiń ólsheýsiz ekendigin atap ótip, qaı kezde de elge qadirli mamandar daıarlap kele jatqan oqytýshylyq quramǵa alǵys aıtyp, stýdentterine sáttilik tiledi. Almaty memlekettik medısına ýnıversıtetinde oqyp júr­geninde maıdanǵa barýǵa óz er­kimen aryz jazyp attanyp, teńdessiz erlik kórsetken Keńes Odaǵynyń Batyry Mánshúk Mámetovanyń atyn ıelený osy oqý ornynyń ujymyna orasan zor jaýapkershilik júkteıtinin de atap ótti oblys ákimi. Aıta ketý kerek, 1943 jyldyń 16 qazanynda Qarataı kóliniń jaǵasynda jaý­men betpe-bet qalyp, erlikpen qaza tapqan 100-atqyshtar brı­ga­dasynyń pýlemetshisi Mán­shúk Mámetova men mergen Ybyraıym Súleımenov Nevel qalasynyń túbinde qatar jerlengen. 360 fashısti vıntovkasymen joıǵan mergen Ybyraıym Súleımenovtiń erligi de osy kezge deıin aıtylmaı keledi. Ol qaza tapqanda, Jýaly aýdanynda áıeli men bir qyzy qalǵanyn jazǵan edi Ázilhan Nurshaıyqov.

Qazirgi ýaqytta feldsher, medbıke, tis tehnıgi maman­dyqtary bo­ıynsha 1500-den astam stýdent bilim alyp jat­qan Aqtóbe joǵary medısına koledji 2017 jyly Keńes Odaǵynyń Batyry Mánshúk Mámetovanyń esimin ıelendi. Bul iste kolledjdiń burynǵy dırektory Vadım Iýgaı marqumnyń eńbegi zor. Ol 2006 jyly Mánshúk Mámetovanyń esimin berýdi Úki­metke jazyp, onyń jaýabyn on jyl boıy kútti. Vadım Iýgaı men eńbek ardageri Ǵalymjan Baıderbes 2017 jyly osy oqý ornynda Mánshúk Mámetova murajaıyn jasaqtady. 

AQTО́BE