Kúni keshe ǵana Parıjde ótken Rolan Garros týrnıri aıaqtalǵan bette tennısshilerdiń álemdik reıtıngi qaıta jańardy, dep habarlaıdy Egemen.kz.
Áıelder arasynda aýstralııalyq Eshlı Bartı (8717 upaı) áli de jeke-dara kósh bastap tur. Ekinshi jáne úshinshi oryndardy rýmynııalyq Sımona Halep (7255) pen japonııalyq Naomı Osaka (5780) ıelenýde.
Sondaı-aq, amerıkalyq Sofııa Kenın (5760), ýkraınalyq Elına Svıtolına (5260), chehııalyq Karolına Plıshkova (5205), kanadalyq Bıanka Vanessa Andreeský (4555), Chehııanyń taǵy bir ókili Petra Kvıtova (4516), nıderlandtyq Kıkı Bertens (4505) jáne AQSh áıgili oıynshysy Serena Ýılıams (4080) úzdik ondyqtyń qataryna enip otyr.
Al, bıylǵy týrnırde aıdy aspanǵa shyǵaryp, Rolan Garrostyń jeńimpazy atanǵan 19 jastaǵy Polshanyń jas juldyzy Iga Svıontek (2960) qazirgi kezde 17 orynǵa taban tiredi. Oǵan deıin ol 54 satyǵa turaqtaǵan edi.
WTA reıtınginde qazaqstandyq tennısshiler arasynda eń úzdik kórsetkish Elena Rybakınaǵa (2696) tıesili. Ol 19 oryndy ıelenýde. Iýlııa Pýtınseva (2015) 27 satyǵa jaıǵassa, Zarına Dıas (928) 79 oryndy enshileýde.