Qazaqstannyń astanasynda serýendep qana qoımaı, ádemi kórinisterdi tamashalap, qalanyń qarbalasynan demalýǵa bolatyn oryndar kóp, dep habarlaıdy Egemen.kz ákimdiktiń baspasóz qyzmetine silteme jasap.
Ákimdiktiń resmı saıty Nur-Sultandaǵy eń kórkem jerler toptamasyn daıyndady.
Trıatlon, Prezıdent saıabaqtary men Esil ózeniniń jaǵalaýy. Qazirgi ýaqytta bul jerlerdi jaıaý júrginshiler aımaqtary men velosıped joldary baılanystyrady, olar qajetti ınfraqurylymmen jabdyqtalǵan. Elordalyq jastar bos ýaqytynda sportpen shuǵyldanýy úshin osy jazda kóptegen kópir asty keńistikteri paıda boldy.
«Jeruıyq» saıabaǵynyń 21 gektar aýmaǵynda aǵash pen butanyń 11 túrinen turatyn toǵaı bar. Qazirgi kezde olardyń sany 10 myń danaǵa jetip otyr. Úlken saıabaqty oryndyqtar men músinder ornatylǵan kóptegen joldar men velojoldar kesip ótedi.
Nur-Sultan botanıkalyq baǵy –Qazaqstannyń astanasyndaǵy eń úlken, eń jas saıabaq. Baqtyń shyǵys bóliginde sýburqaqtar men úsh kópirli toǵan bar. Munda Eýropadan, Azııadan jáne Soltústik Amerıkadan 90 myńǵa jýyq aǵash pen buta, júzdegen kolleksııalyq kóshetter otyrǵyzyldy. Velosıped pen júgirý joldary jasyl aımaqtarda da kezdesedi.
Elordanyń basty býlvary «Nur Jol» qonaqtardy kún saıyn mýzykalyq fontandarmen jáne erekshe músindermen qarsy alady. Jaıaý júrginshiler aımaǵynyń boıynda sheteldik jáne jergilikti sáýletshilerdiń erekshe ǵımarattary bar. Keshke býlvar kóptegen shamdarmen jaryqtandyrylady. Jaıaý serýenshiler bir jaǵynan Aqordadaǵy prezıdent saraıyn da, álemdegi eń úlken shatyr tárizdi qurylym – «Han Shatyr» saýda oıyn-saýyq ortalyǵyn da kóre alady.
Aıta keteıik, elorda qonaqtary men turǵyndaryna yńǵaıly bolý úshin aýlalar men qoǵamdyq oryndardy abattandyrýǵa kóp kóńil bólinýde. Bıyldyń ózinde Nur-Sultanda 150 aýla men 50 qoǵamdyq oryn abattandyryldy. Bul 300 myńnan astam adamdy sportpen aınalysýǵa qolaıly jaǵdaılarmen qamtamasyz etýge múmkindik beredi.