Jambyldyq jas ónertapqysh Baqtııar Turǵanbaevtyń erekshe tabysy búginde talaıdyń qyzyǵýshylyǵyn týdyryp otyr. Ol óziniń izdenisi nátıjesinde jýyrda aýyl sharýashylyǵy salasyna qolaıly traktor jasap shyǵarǵan. Qazirgi kezde Baqtııar Sarysý aýdany Saýdakent aýylyndaǵy Áıteke bı atyndaǵy orta mektepte 11-synypta oqıdy. Aýyl balasynyń bul jetistigi az ýaqytta qoldaýǵa ıe boldy.
Aýdandyq bilim bólimine qarasty Saýdakent aýylyndaǵy tehnıkalyq shyǵarmashylyq ortalyǵynyń dırektory Muhtar Meldeevtiń aıtýynsha, mektepterdegi «Avto-21» úıirmesine 10-11 synyptyń oqýshylary qatysady eken. Nátıjesinde Áıteke bı atyndaǵy mekteptiń 11-synyp oqýshysy Baqtııar Turǵanbaev «Aýylsharýashylyq tehnıkalar men jabdyqtar salasyndaǵy tehnıkalyq qurastyrý» atalymy boıynsha «Shaǵyn traktor» taqyrybyndaǵy jumysyn sátti qorǵap shyqqan. Sonymen qatar jas ónertapqyshtyń jumysyna Saparǵalı Baıýlıev jetekshilik etip, oqýshyǵa naqty baǵyt, baǵdar berip otyrǵan.
Búginde atalǵan aýyldaǵy tehnıkalyq shyǵarmashylyq ortalyǵynda oqýshylardy ınjenerlik mamandyqqa baýlý jumystary júrgizilýde. Mundaǵy jumys óziniń nátıjesin berip te úlgerdi. Al Baqtııardyń qurastyrǵan bul traktory aryq qazyp, jer jyrtýǵa qolaıly eken. Sondaı-aq ol janarmaıdy da asa kóp qajet etpeıtin tehnıka. Búginde ártúrli tehnıkanyń bólshekterinen qurastyrylǵan shaǵyn traktorǵa aýdandaǵy dıqandar da qyzyǵýshylyq tanytyp otyr. Aldaǵy ýaqytta ózi shaǵyn, ózi únemshil tehnıka jergilikti sharýalardyń kádesine jaraýy múmkin.
Jambyl oblysy