Batys Qazaqstan oblysynda bilim salasyn odan ári damytyp, halyqqa sapaly bilimdi qoljetimdi etý úshin keshendi jumys atqarylýda. Bul Prezıdenttiń bıylǵy Joldaýynda aıtylǵan tapsyrma bolatyn.
Bıyl oblysta 6 mektep jańadan salynyp jatyr. Onyń qurylysyna 8 mlrd teńge bólingen. Buǵan qosa Oral qalasy men aýdandarda memlekettik baǵdarlamalar aıasynda 4,5 mlrd teńgege 33 bilim berý mekemesi kúrdeli jóndeýden ótýde.
Memlekettik mańyzy bar bul iske qazir jeke ınvestorlar da tartyla bastapty. Máselen, osy kúnderi «Qaz-Holl» kompanııasy Oral qalasynyń №31 mektebiniń ǵımaratyn, «Nurkapstroı» mekemesi №52 mekteptiń qurylysyn júrgizýde.
О́ńirde mektepke deıingi uıymdarda 30 myńnan astam bala tárbıelenýde. 3 jastan 6 jasqa deıingi balalardy mektepke deıingi tárbıemen qamtý 100 paıyz jolǵa qoıylǵan. Al 1 men 6 jastaǵy balalar 70% qamtamasyz etilgen.
Pandemııanyń sebebinen bolǵan ózgerister, qashyqtan oqý máselesi alǵa shyqqanymen, ustazdar qaýymy jańa jaǵdaıǵa tez beıimdeldi. Oqýshylardyń bos ýaqytyn tıimdi uıymdastyrý maqsatynda otbasylyq, týrıstik, ekologııalyq, tehnıkalyq baǵyttaǵy sharalar qashyqtan uıymdastyrylyp, oǵan 50 myńnan astam oqýshy qamtyldy.
Shyńǵyrlaý aýdanynyń metodıkalyq kabıneti respýblıkalyq «Úzdik aýdandyq, qalalyq metodıkalyq kabınet» saıysynda jeńimpaz atandy.
Al oblystyq bilim berýdi damytý metodıkalyq ortalyǵy respýblıkalyq saıysta júldeli 2-oryn alyp, úzdik shyqty.
Oblystyń 35 oqýshysy respýblıkalyq jáne halyqaralyq olımpıadalar men ǵylymı saıystardyń júldegeri bolǵan.
– О́skeleń urpaǵymyz da tabystarymen qýantyp keledi. Oblysymyzdyń 29 oqýshysy daryndy balalarynyń «Aıqanat» baıqaýynyń jeńimpazy atanyp, Tuńǵysh Prezıdent qorynyń grantyna ıe boldy. Bul kórsetkish boıynsha respýblıka boıynsha birinshi oryndamyz. Bizdiń balalar Býrabaıda ornalasqan IQanat High School of Burabay mektebinde oqýyn jalǵastyrýda, – dedi oblystyq máslıhat depýtattary aldynda esep bergen óńir basshysy Ǵalı Esqalıev.
Oblysta bilim sapasymen qatar, bilim ordalarynyń ınfraqurylymyn damytýǵa mán berilýde.
Mysaly, 2020 jyldyń basynda oblysta oqýshynyń kóptiginen úsh aýysymda sabaq beretin 7 mektep jáne ǵımaraty apattyq jaǵdaıda turǵan 7 mektep bar edi. Jyl boıy jasalǵan jumystyń nátıjesinde qazir 5 mektepte úsh aýysymdylyq joıyldy. Qalǵan 2 mekteptiń máselesin óńir basshylary keler jyly sheshýge ýáde berip otyr. Jaqynda 450 oryndyq mektep paıdalanýǵa berilip, oǵan estetıkalyq baǵyttaǵy gımnazııa kóshirildi.
Sondaı-aq bıyl apatty jaǵdaıda turǵan eki mektep jańa ǵımaratqa kóshedi. «Qalǵan mektepterdiń máselesi de 2021-2022 jyldary sheshiledi» deıdi oblystyq bilim basqarmasynyń basshysy Aıgúl Myńbaeva.
Bıyl respýblıkalyq fızıka-matematıka mektebi Batys Qazaqstan oblysynda muǵalimderdiń biliktiligin arttyrý jáne qosymsha bilim berý ortalyǵyn ashýdy josparlap otyr. Al 2021 jyldyń jańa oqý jylynda 1-6 synyp oqýshylaryna arnalǵan «Fizmat Academy» mektebi jumysyn bastamaq.
– Elbasynyń bes áleýmettik bastamasyna sáıkes stýdentterdi jataqhanamen qamtamasyz etý maqsatynda jeke ınvestorlar esebinen 2020 jyly Mahambet О́temisuly atyndaǵy Batys Qazaqstan ýnıversıtetine 500 oryndyq jataqhana jáne kolledjderge jalpy qýattylyǵy 200 orynǵa arnalǵan 2 jataqhana qurylysy júrip jatyr, – deıdi Ǵalı Esqalıev.
Budan bólek, ındýstrıaldyq kolledjdiń jataqhanasy qazir kúrdeli jóndeýden ótýde. Jóndeý aıaqtalǵan kezde stýdentterge arnalǵan 300 oryndyq jataqhana paıdalanýǵa berilmek.
Bıyl 1 qyrkúıekte Batys Qazaqstan joǵary medısınalyq kolledjinde 144 oryndyq jataqhana tapsyrylǵan bolatyn.
Sońǵy jyldary jas túlekterge tegin bilim berý úshin oblystyq bıýdjetten arnaıy grant berilip keledi. Bıyl 100 grant bólindi. Bul granttyń 37-si – óńirge asa qajetti medısınalyq mamandyqqa berilgen eken. Sondaı-aq 9 stýdent – pedagogıka, 4 stýdent teologııa salasy boıynsha «ákim grantymen» bilim alýda.
Memleket basshysynyń tapsyrmasy boıynsha óńirdegi barlyq mektep pen balabaqshany beınebaqylaý júıesimen qamtý jáne sanıtarlyq talaptarǵa sáıkestendirý jumysy qolǵa alynǵan.
Batys Qazaqstan oblysy