Úsh myńnan asa jádigeri bar Baızaq aýdandyq tarıhı-ólketaný mýzeıine kelýshilerdiń sany jyldan-jylǵa arta túsýde. Jaqynda murajaı jádigerleri taǵy da tolyǵa tústi. Mýzeıimizge kópbalaly ana, ardaqty áje Zátekúl Moldabaeva arnaıy kelip, ózi qoldanǵan birneshe buıymdy tabystady.
– Estiniń sózi, eskiniń kózi qymbat demekshi, myna samaýryn kezinde anamnan syı retinde berilgen. Ol kezde nebári 17-de edim. Sodan beri mine, jasym 80-nen asyp ketti, qanshama qonaq, otbasym osy ydystan shaı iship, sýsyndandy. Al mynaý, óz qolymmen toqyǵan qorjyn. Jastar jaǵy bile bermes, bul qolóner buıymy tek tórde sándik úshin ilinip turmaıdy, ertede ata-babalarymyz as-aýqat, kıim-keshek salyp júrýge qoldanǵan. Qolymdaǵy qasqyr ishikke de kóp jyl bolǵan. Joldasym Dáýletbaı mal baǵý isimen aınalysqandyqtan, qysta sýyqqa tózimdi osyndaı tondar arnaıy tapsyryspen tigiletin. Qazir tehnıkanyń damyǵan zamany ǵoı. Kezinde bul buıymdar úlken eńbekpen jasalatyn. Osyny jas urpaq uǵynsyn dep ózderińe ákelip otyrmyn. Kózdiń qarashyǵyndaı saqtarsyńdar qaraqtarym, – deıdi qart ájeı.
Atadan amanat – urpaqqa ulaǵat. Elbasy Nursultan Nazarbaev «Bolashaqqa baǵdar: rýhanı jańǵyrý» maqalasynda «Men halqymnyń taǵylymy mol tarıhy men erte zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn» dep aıtqanyndaı, keıingi jas urpaq aldyńǵy tolqyn aǵa býynnyń ónegesinen ǵıbrat alyp, kemel keleshekke bastary anyq.
Aıdana ShOTBASOVA,
Baızaq aýdandyq tarıhı-ólketaný mýzeıiniń qor saqtaýshysy