Qataryna eki myń jasty biriktirgen Aqtóbe óńirindegi volonterlik toptar pandemııa kezinde, tazalyq aksııasyn ótkizýde, qıyn balalarmen jumys isteýde jáne ata-anasy joq balalarǵa qamqorlyq tanytýda erekshe kózge tústi. Sondaı-aq joǵalǵan adamdardy izdestirip tabýda polısııa qyzmetkerlerine kómegin tıgizdi. Az ýaqyt ishinde biraz tájirıbe jınaqtaǵan belsendi jastar jumys munymen toqtap qalmaıdy dep otyr.
Jyl basynda erikti jastar toby eń áýeli óńirdegi kásiptik-tehnıkalyq bilim beretin oqý oryndarynda, Q.Jubanov atyndaǵy Aqtóbe óńirlik ýnıversıteti men M.Ospanov atyndaǵy Batys Qazaqstan memlekettik medısına ýnıversıtetinde quryldy. Jyl basynda 1000 erikti jas qurǵan 35 toptyń sany qazir 90-ǵa artty. Aýdan-aýyldarda da jastar belsendiligi artyp keledi. Sonyń ishinde qyzdardyń belsendiligi kúshti. Qazir óńirimizdegi eki myń volonterdiń eń eresegi 41 jasta bolsa, eń kishisi – 14 jasta. Volonterlerdiń 62%-y –qyzdar. Toptardyń quramy mynadaı: jumysshy jastar – 45,8%, JOO stýdentteri – 16,5%, kásiptik-tehnıkalyq bilim beretin oqý oryndarynyń stýdentteri – 12,7%, mektep oqýshylary – 20,5%, jumyssyz jastar jáne kásipkerler – 4,5%.
Jyl basynda Aqtóbe oblysynda qozǵalystyń «Birgemiz» tujyrymdamasy negizinde 43 tarmaqtan turatyn jumys jospary bekitildi.
«Qoǵamdyq máselege aralasý arqyly kópshilik jastardyń ómirlik ustanymdary qalyptasty. Olar qoǵammen qarym-qatynas joldaryn úırendi, eń bastysy – tájirıbe jınaqtady. Men de kóp nárseni úırendim», deıdi oblystyq jastar saıasaty máseleleri basqarmasynyń basshysy Sábıt Muqanov.
Tótenshe jaǵdaı kezinde oblystyq volonterlik shtab qurylyp, «AntiCovid19» tobynyń jastary Aqtóbedegi provızorlyq aýrýhanalar men jedel járdem beketteriniń qyzmetkerlerine ystyq tamaq jetkizip turdy. Sonymen qatar volonterler naýqastar úshin 13 ottegi konsentrator apparatyn, 67 ottegi ballondaryn, 146 ottegi jastyqtaryn jetkizip berdi.
Eriktiler toby jaz boıy qıyn jaǵdaıda qalǵan balalarmen jumys istegenin de aıta ketý kerek. Jetimder úıinen shyqqan kámelet jasyna jetken balalar turatyn «Aıala» ortalyǵynda, «Meıirim» jastardy áleýmettik beıimdeý úıinde jáne «Jaına» múgedek balalardy ońaltý ortalyǵynda jumys istep, kóptegen túıtkildi suraqtardyń basyn ashty. Jastyń tilin jas túsinedi demekshi, ómirde qıyn jaǵdaıda qalǵan balalar ishki syrlaryn tek qurdastaryna ǵana aqtara alady. Bul jumysqa volonterler arnaıy trenıngter men semınarlarda oqyǵannan keıin ǵana jiberildi.
«Umit» jobasy boıynsha 30 volonter «Zello izdeý» komandasy tobymen jáne jergilikti polısııa bólimimen birlese joǵalǵan adamdardy izdestirýmen aınalysqanyn aıta ketý kerek. «Taza alem» jobasy negizinde 3249 belsendi tazalyq aksııasyn ótkizip, tabıǵat aıasynda demalýshylarǵa jadynamalar taratty, qoqys jınady.
«Birgemiz: taza alem» baǵyty boıynsha shaǵyn grant baıqaýynan Aqtóbe oblysynan 7 joba usynylyp, onyń 4 jobasy maquldandy. Sonyń arqasynda jastar árbir jobaǵa 300 myń teńgeden grant aldy. Osy sharanyń arqasynda, qazirde qalada, aýdan ortalyqtary men eldi mekenderde tazalyq aksııalary jıi-jıi uıymdastyrylyp, oǵan qatysýshy eriktiler sany da ósip keledi. Máselen, halyqaralyq Jastar kúni qarsańynda ótkizilgen «Taza jaǵalaý» aksııasyna 400-den astam jas qatysyp, olar 40 tonna qoqys shyǵardy.
Az merzim ishinde jasaqtalǵan toptardyń eriktileri osyndaı qoǵamdyq mańyzy zor isterdiń uıymdastyrýshylary da bola bildi. Eń bastysy –jastarymyz qoǵamdaǵy qordalanǵan máselelerdi kórip qana qoımaı, olardy sheshýge shyn janashyrlyqpen kirisip júrgeni qýantady.