Memleket basshysy 2020 jyldy «Volonter jyly» dep jarııalaǵan soń Batys Qazaqstan oblysynda da volonterler qozǵalysyn damytý úshin arnaıy jumys jospary bekitilgen bolatyn.
Aldymen volonterlerdiń jumysyn júıelendirýge arnalǵan volunteer 07.kz saıty quryldy. Saıtqa Oral qalasy men 12 aýdan boıynsha 10 myńnan astam adam volonter retinde tirkeldi. Onyń ishinde zeınet jasynan asqan 8 «altyn» volonter, 50 jastan asqan 34 «kúmis» volonter bar eken. Eriktilerdiń qalǵany – jastar.
– Bizdiń batysqazaqstandyq volonterler jyl basynan beri 18 myńnan astam shara ótkizdi. Ásirese indet kezinde eriktiler oblys boıynsha 13 myńnan astam otbasyna azyq-túlik, dári-dármek jáne basqa da kómek kórsetti. Sonyń ishinde Ekinshi dúnıejúzilik soǵysy men eńbek ardagerlerine erekshe nazar aýdaryldy. Osy topqa jatatyn 324 ardagerdiń úıine volonterler 10 kún saıyn arnaıy baryp, qajetti turmystyq kómek kórsetti, – deıdi Batys Qazaqstan oblysynyń ákimi Ǵalı Esqalıev.
Karantınniń alǵashqy kezeńinde el ishi dúrligip, qarapaıym betperdeniń ózi tapshy bolǵany belgili. Osy kezde oraldyq eriktiler halyqqa 350 myń maskany tegin taratty. Sonyń ishinde 80 myń betperdeni volonterler ózderi qoldan tikken bolatyn.
Ásirese pandemııa kezinde adam ómirin saqtap qalý úshin kúresken, koronavırýs indetine ózderi shaldyqqan medısına qyzmetkerlerine, jalpy sany 409 adamǵa volonterler sý, dári-dármek, basqa da turmystyq qajetti zattaryn jetkizip, únemi qamqorlyq jasap turdy. Sondaı-aq karantın jáne lokdaýn kezinde volonterler quqyq qorǵaý organdarynyń qyzmetkerlerimen birge qoǵamdyq qaýipsizdikti qamtamasyz etý jumystaryna atsalysyp, 1206 reıdke birge shyǵypty.
«BIRGEMIZ» taza-alem jalpyulttyq jobasy aıasynda batysqazaqstandyq eriktiler jyl basynan beri 18 aksııa uıymdastyryp, 62,2 tonna qoqysty shyǵarǵan.
Shynynda da volonterler qozǵalysy álemdi ábigerge salǵan indet kezinde keń qanat jaıdy. Adamzatqa qaýip-qater tóndirgen pandemııa el-jurtty biriktirip ketti. Jer-jerde qaıyrymdylyq sharalary kúsheıdi. Máselen, Terekti aýdanynda volonterler 3000-ǵa jýyq maska daıyndap, tegin taratsa, tótenshe jaǵdaı kezinde 183 otbasyna azyq-túlik jetkizip, jalǵyz basty qarııalarǵa 38 mekenjaılyq kómek kórsetti. Aýdannyń 6 volonteri karantın kezindegi eńbegi úshin Memleket basshysy Qasym-Jomart Toqaevtyń alǵys hatymen marapattaldy.
Oral qalasynda da 104 volonterlik uıym qataryndaǵy 2 myńǵa jýyq volonter barlyǵy 5 myńnan astam otbasyna azyq-túlik, dári-dármek jáne basqa da túrde adrestik kómek kórsetken eken. Sonymen qatar volonterlerdiń kómegimen jınalǵan qarajat esebinen 583 otbasyna azyq-túlik, 278 otbasyna dári-dármek jetkizildi. 53 otbasynyń úı jumystaryn atqardy. Bular shyn máninde kómekke muqtaj múgedek nemese qarııa adamdar bolatyn. Sondaı-aq 168 otbasy tótenshe jaǵdaı kezinde beriletin 42500 teńgelik áleýmettik járdemaqyny dál osy eriktilerdiń kómegimen aldy deýge bolady. О́ıtkeni pandemııa kezinde ótinim berý negizinen onlaın júrdi. Al smartfon arqyly onlaın ótinim berýdi ekiniń biri bile bermeıtin.
Oral qalasynda tek qana volonterlerdiń kúshimen 130 myń maska tegin taratyldy. Osynyń ishinde 15 myń maska qoldan tigilgen.
Qoǵamdyq qaýipsizdikti qamtamasyz etý isine eriktiler kóp úles qosty. Oral qalasynda olar quqyq qorǵaý organdary qyzmetkerlerimen birge 100-ge jýyq reıd jasaǵan. Bul reıdter kezinde sanıtarlyq-epıdemııalyq talapty buzǵan 68 derek anyqtalyp, tıisti organdarǵa joldanǵan.
Baıqap qarasaq, jaqsylyq ta, jamandyq ta juqpaly ǵoı. Oraldyq Qadyrbek Halelov ınstagram jelisinen bir kezderi mektepte sabaq bergen ustazy Aıbolat Qurymbaevtyń indet kezinde erikti bolyp, ıgi ispen belsendi aınalysyp júrgenin kórip qalypty. Sóıtip bir top dostarymen birge Aıbolatqa habarlasqan. Sóıtip jergilikti shtabtan Oral qalasynda turatyn muqtaj otbasylardyń mekenjaıyn alyp, birneshe márte qaıyrymdylyq kómek kórsetti.
– Halyqtyń azamattyq belsendiligin arttyratyn eriktiler qozǵalysyn memleket te barynsha qoldaýy, qorǵaýy tıis. «Volonterlik qyzmet týraly» zańnan bólek, keıbir máselelerdiń de basy ashylǵany, naqty anyqtalǵany durys. Mysaly, tótenshe jaǵdaı kezinde eriktiler men mekemeler arasynda kelisimshart jasala ma? Volonterler tehnıka qaýipsizdigi boıynsha nusqaýlyqtan ótýi tıis pe? Jeke qorǵanysh quraldarymen eriktini kim qamtamasyz etedi? О́zi satyp alýy kerek pe? Erikti qoǵamdyq jolaýshylar kóliginde tegin júre ala ma? Volonterlerdiń atqarǵan qyzmetterin, qaıyrymdylyq isterin tirkep, esepke alyp otyrǵan mekeme, uıym bar ma? Árıne eriktiler bul ıgi isterin aqjúrektikpen, esh qaıtarym kútpeı jasap júrgeni anyq, biraq bul is onyń jeke basyna qaýip tóndirmeýi tıis. Memleket tarapynan mundaı azamattyq ustanymy myǵym, belsendi azamattardy yntalandyrý, marapattaý da oılastyrylýy jáne bul is óte ádil júrgeni jón, – deıdi oraldyq volonter, Ǵylymı zertteýlerdi qorǵaý qorynyń jetekshisi Aıbolat Qurymbaev.
Elimizde pandemııanyń shyrqaý shegi jaz aılaryna keldi. Qazir Batys Qazaqstan oblysynda da indet qaýpi seıilip, halyq kúndelikti tirligin súrip jatyr. Degenmen eriktilerge qashan da jumys tabylady. Jaqynda ǵana qala kúni merekesi aıasynda Oral qalasynyń volonterleri «Degdar» gýmanıtarlyq qorymen birlese otyryp múmkindigi shekteýli qala turǵyndarynan 160 adamǵa, Ekinshi dúnıejúzilik soǵysynyń 40 ardagerine azyq-túlik sebetin taratty.
– Qazaqta «kóńil – qymbat» degen bar ǵoı. Bizdiń is-sharamyzdyń bir maqsaty – sol qazynaly qarttar men qala turǵyndarynyń kóńilin bir kóterý – deıdi jastar belsendisi Dýlat Júsipqalıev.
Batys Qazaqstan oblysy