Qazaqstan EAEO aıasynda «veto» quqyǵyn joıýǵa jol bermeıdi. Bul týraly Eýrazııalyq úkimetaralyq keńes otyrysynyń qorytyndysyn shyǵara otyryp, Saýda jáne ıntegrasııa vıse-mınıstri Janel Kýshýkova málimdedi.
Eýrazııalyq ekonomıkalyq ıntegrasııany damytýdyń 2025 jylǵa deıingi strategııalyq baǵyttarynyń jobasy talqylaýdyń mańyzdy máseleleriniń biri boldy. Buǵan deıin, Joǵary Keńestiń 2020 jylǵy 19 mamyrdaǵy otyrysy barysynda el Prezıdenti Qasym-Jomart Toqaevtyń eskertýlerimen Strategııa jobasy pysyqtaýǵa jiberilgen bolatyn.
«Qazirgi ýaqytta Komıssııanyń kadr saıasaty jáne EEK-tiń saýda sharalary jónindegi sheshimderine «veto» quqyǵyn qoldaný bóliginde Strategııa jobasyna qazaqstandyq usynystardy talqylaý jalǵasýda. Kelissózderde komıssııada jumys isteý úshin úmitkerlerdi tek izdenýshilerdiń kásibı daǵdylary negizinde irikteý máselesiniń prınsıptiligi atap ótildi. Sondaı-aq «veto» quqyǵyn qoldaný memlekettiń sózsiz egemendi quqyǵy bolyp sanalady, bul oǵan estýge jáne ekonomıkalyq múddelerge sáıkes kelmeıtin sheshimderdi qabyldaýǵa jol bermeýge múmkindik beredi», dedi Saýda jáne ıntegrasııa vıse-mınıstri Janel Kýshýkova.
EAEO elderi arasynda COVID-19 jaǵdaıynda jolaýshylar qatynasyn qalpyna keltirý máselesi de talqylandy.
«Qazirgi ýaqytta álemde COVID-19 koronavırýs ınfeksııasy óte alańdatarlyq jaǵdaıda. Sondyqtan biz úshin bul másele óte sezimtal. О́ıtkeni azamattarymyzdyń qaýipsizdigi bárinen joǵary. Osy turǵyda EAEO-ǵa múshe memleketterdiń sanıtarlyq dárigerlerine EEK-pen birlesip, qajetsiz táýekelge jol bermeı, EAEO-ǵa múshe memleketter arasyndaǵy jolaýshylar kóligi qatynasyn jańartý jóninde tásilder ázirleýdi usyndyq», dedi ol.
Atalǵan máseleni qaraý barysynda Úkimet basshylary EADB-nyń bastamasyn talqylady.
«Eýrazııalyq damý banki shyǵatyn azamattardyń COVID-19 testileriniń nátıjelerin keıinnen EAEO elderimen ózara tanı otyryp shoǵyrlandyratyn sıfrly platforma qurýdy usyndy. EADB-nyń usynylyp otyrǵan tásili azamattardyń EAEO ishindegi qozǵalysyn jeńildetýge múmkindik beredi. Jalpy, biz bul bastamany qoldadyq. Endi onyń praktıkalyq iske asyrylýyn qamtamasyz etý qajet», deıdi Saýda jáne ıntegrasııa vıse-mınıstri.
Eske sala keteıik, EAEO-ǵa múshe memleketterde karantındik sharalardyń engizilýine baılanysty elder arasyndaǵy jolaýshylar qatynasy toqtatyldy.
Sonymen qatar premer-mınıstrler EAEO-da taýarlardyń transshekaralyq elektrondy saýdasyn retteý máselesin qarady.
«Aǵymdaǵy ahýal álemdik IT-naryq óte jyldam qarqynmen damyp kele jatqanyn kórsetedi. Sonymen qatar ol bıýdjetke túsetin túsimderdi azaıtý, taýarlardyń tómen sapasy túrinde táýekelderdi kóteredi. Jańa shynaıylyq jaǵdaıynda biz transshekaralyq elektrondy saýdany retteýdiń negizgi baǵyttaryn kelistirdik», dep túsinikteme berdi vıse-mınıstr.
Úkimet basshylary sondaı-aq eksportty damytýdyń birlesken sharalary men EAEO sheńberinde agroónerkásiptik keshendi damytýdyń birlesken boljamdaryn kelisti. Bul ýaǵdalastyqtar otandyq bızneske úshinshi elderdiń naryqtaryna eksport spektri men kólemin keńeıtýge, sondaı-aq aýyl sharýashylyǵy naryǵyn odan ári damytýdyń kókjıegin belgileýge múmkindik beredi.
Aıta ketelik, 2020 jyldyń 9 qazanynda Eýrazııalyq úkimetaralyq keńestiń kezekti otyrysy ótken bolatyn.