Sybaılas jemqorlyqqa qarsy is-qımyl agenttiginiń bastamasymen «Ar-namysty arqalaǵan rýhty batyr Baýyrjan» taqyrybynda kezekti onlaın adaldyq saǵaty ótti, dep habarlaıdy Egemen.kz.
Bıyl aty ańyzǵa aınalǵan komandır, kóptegen marapattardyń ıegeri, jazýshy jáne Keńes Odaǵynyń Batyry Baýyrjan Momyshulynyń týǵanyna 110 jyl toldy.
Batyldyq, adaldyq jáne tabandylyq qasıetter Baýyrjan Momyshulyn Halyq qaharmany etti. Onyń tulǵasynan joǵary patrıottyq rýh, sheshim qabyldaýdaǵy senimdilik, tártip, danalyq pen parasattylyq qasıetteri de tabylady.
Onlaın-dáris barysynda jastar polk komandıriniń batyrlyq áreketteri men ómirlik qaǵıdalaryn eske túsirdi.
Batyrdyń kózqarasynsha, senim qamaly – adamdyq pen adaldyqqa aparatyn uly kúsh ispettes. Senim bar jerde úmit te bar. Bul týrasynda ol bylaı tujyrym jasaıdy: «Sen – ata-anańnyń úmitisiń. Sen qaıtalanbas tulǵasyń, óz ómirińniń belsendi jasaýshysysyń, sondyqtan ózińe ǵana sen».
Osylaısha osy oıy arqyly jastardyń boıyndaǵy senimniń mańyzdylyǵyn, sonymen qatar ózine ári ata-anasynyń tárbıesine berik adam eshqashan arsyzdyqqa barmaıtyndyǵyn meńzeıdi.
Ultjandylyq pen batyrdyń ana tilge degen qurmeti erekshe nazar aýdartady. Ol: «Anamyzdyń aq sútimen boıymyzǵa daryǵan tilimizdi umytý-búkil ata-babamyzdy umytý», – degen.
Baýyrjan Momyshulynyń murasy erlik pen tártipke, patrıotızmge toly, ómir joly ar-namys, ádildik jáne adamgershilik qaǵıdalaryna negizdelgen.
«Adaldyq saǵatynyń» uıymdastyrýshylary atalǵan qundylyqtardy jastardyń boıyna sińirý arqyly adal eńbek pen rýhanı adamdyq qasıetter joǵary baǵalanatyn, jemqorlyqsyz parasatty qoǵam qurýǵa bolady dep senim bildiredi.
Aqparat jáne qoǵamdyq damý mınıstrliginiń qoldaýymen beıne-sabaq respýblıkalyq jáne óńirlik telearnalar efırinde kórsetilip, sondaı-aq Agenttiktiń Youtube-arnasynda jáne áleýmettik jelilerde ornalastyryldy.