Nur-Sultanda "Halyq únine qulaq asatyn memleket" jobasy aıasynda "Qazaqstan jastary – 2020" ulttyq baıandamasynyń saraptamalyq talqylaýy ótti, dep habarlaıdy Egemen.kz.
"Rýhanı jańǵyrý" qazaqstandyq qoǵamdyq damý ınstıtýty "Qazaqstan jastary – 2020" ulttyq baıandamasynyń jobasyn jetildirý úshin elimizdiń ozyq oıly sarapshylarynyń basyn qosyp, qoǵamdyq talqylaý ótkizdi.
Sarapshylarmen birlesip daıyndalǵan "Jastar" ǵylymı-zertteý ortalyǵynyń bul jobasynda demografııa, densaýlyq, bilim berý, qoǵamdyq-saıası ahýal jáne áleýmettik-ekonomıkalyq ortanyń mańyzdy máseleleri kóterilgen. "Rýhanı jańǵyrý" qazaqstandyq qoǵamdyq damý ınstıtýtynyń Basqarma Tóraǵasy Danııar Esınniń aıtýynsha, búginde Ulttyq baıandama "Jastar" ǴZO-nyń brendine aınalǵan. Naqty aıtqanda, bul zertteýlerge memlekettik jáne jergilikti atqarýshy organdardan bastap, basqa da qoǵamdyq ınstıtýttar súıenedi.
"Aqparat jáne qoǵamdyq damý mınıstrliginiń tapsyrysymen daıyndalǵan "Qazaqstan jastary - 2020" ulttyq baıandamasy "Jastar" ǵylymı-zertteý ortalyǵynyń negizgi qujaty sanalady. Iаǵnı, jastar arasyndaǵy ózekti prosesterdi boljaý, memlekettik jastar saıasatyn qazirgi zaman saıasatyna beıimdeý jáne jastardy qoǵamnyń áleýmettik-ekonomıkalyq prosesterine qatysýyn arttyrý máselerin qarastyrady. Jalpy, "Qazaqstan jastary" ulttyq baıandamasy segizinshi jyl daıyndalyp keledi. Osy aralyqta qazaqstandyq jastardy damytýdyń túrli ózekti máseleleri qamtyldy. Bul jastar ómiriniń negizgi baǵyttary men jaǵdaıyn jan-jaqty taldaýǵa múmkindik beredi", - dep atap ótti Danııar Esın.
Ulttyq baıandama jastardyń demografııalyq sıpattamalary, jastardyń densaýlyǵy men bos ýaqyty, jastar ómirindegi bilim men ǵylym, jastardyń áleýmettik-ekonomıkalyq jaǵdaıy, qazirgi jastardyń qundylyq baǵdarlary men múddeleri, qoǵamdyq-saıası prosesterdegi jastar, jastar ortasyndaǵy qylmys jáne jastar saıasaty sııaqty negizgi 8 negizgi tarmaqty qamtıdy.
Jalpy, "Qazaqstan jastary – 2020" Ulttyq baıandamasyn talqylaýǵa memlekettik organdardyń, ǵylymı-zertteý qoǵamdastyǵynyń, jastar uıymdary men resýrstyq ortalyqtardyń ókilderi qatysty. Máselen, Ulttyq baıandamanyń jumysyna qatysqan jáne jastar ortasyndaǵy qylmys taqyrybyn zerttegen PhD doktory Mádı Shákenovtiń aıtýynsha, zertteý barysynda akademııalyq jumystar men statıstıkalyq derekter jáne halyqaralyq tájirıbege qatysty túrli materıaldar qarastyrylǵan.
"Qazaqstanda kámeletke tolmaǵandardy quqyqtyq qorǵaýdyń, ıývenaldy qylmystyń aldyn alýdyń joldary oılastyrylǵanymen júzege asyrylýy qıyndaý ekenine zertteý barysynda kóz jetkizdim. Jaı ǵana ústirt qarap-aq bul salada kóptegen sáıkessizdikterdi kórýge bolady", - dep sózin qorytyndylady Mádı Shákenov.
Ulttyq baıandamanyń jobasyn kópshilikke "Jastar" ǴZO dırektory Aıan Sakoshev tanystyrdy. Tanystyrylym barysynda Sakoshev sońǵy bes jylda Qazaqstanda jastardyń azaıǵanyn, sonyń saldary bul týý jáne otbasyn qurý sııaqty basqa da áleýmettik-demografııalyq kórsetkishterge áser etip jatqanyn atap ótti. Alaıda, sarapshylardyń boljamy boıynsha jastar sanynyń ósýi 2025 jyldan keıin kútilip otyr.
"Ulttyq baıandama jobasyn jasaýda sarapshylar usynǵan usynystar men tujyrymdarǵa erekshe nazar aýdaryldy. Saraptamalyq talqylaýdyń negizgi maqsaty – Ulttyq baıandamanyń mańyzdylyǵyn arttyryp, sapasyn jaqsartý. О́ıtkeni, birinshi kezekte, ulttyq baıandama tek analıtıkalyq qujat qana emes, sonymen qatar, qoldanbaly qujat bolǵanyn qalaımyz", - dedi óz kezeginde Aıan Sakoshev.
Ulttyq baıandama bıyl jeltoqsanda jarııalanady dep kútilýde. Aıta keteıik, 2013 jyldan bastap 2019 jylǵa deıingi Ulttyq baıandamalar "Jastar" ǵylymı-zertteý ortalyǵynyń eljastary.kz resmı ınternet-resýrsynda qoljetimdi.