Búgin Nur-Sultanda Uly Otan soǵysyndaǵy Jeńistiń 75 jyldyǵyna arnalǵan "Biz – Jeńistiń muragerimiz!" estafetasy óz máresine jetti, dep habarlaıdy Egemen.kz
Atalmysh estafeta aǵymdaǵy jyldyń 5-aqpanynda Qazaqstan Respýblıkasy ishki ister mınıstri polısııa general-leıtenanty Erlan Turǵymbaevtyń sheshimimen Ulttyq ulanda bastaý alǵan bolatyn.
Taǵzym estafetasynyń negizgi atrıbýty – 1941 jyly Almaty men Bishkek qalalarynda jasaqtalyp, Máskeýden Berlınge deıin jetken Keńes Odaǵynyń batyry general-maıor I.V. Panfılov atyndaǵy 8-shi gvardııalyq motoatqyshtar Rejısskıı, Qyzyl tý Lenın ordendi, Sývorov ordendi dıvızııasynyń Jaýyngerlik Týynyń kóshirmesi. Tý kóshirmesin Qazaqstan áskerı-tarıhı mýzeıiniń Almaty qalasyndaǵy fılıaly, general-maıor Ivan Panfılov nemeresi – Alýa Baıqadamova usyndy.
Shara bastalǵanǵa deıin bas shahardaǵy Panfılovshylar Alleıasyna gúl shoqtaryn qoıý rásimi uıymdastyryldy. I.V.Panfılovtyń nemeresi Alýa Baıqadamova, Ulttyq ulan tárbıe jáne áleýmettik-quqyqtyq jumystar Bas basqarmasynyń bastyǵy polkovnık Aleksandr Kramar, áıgili Jaýyngerlik Týdyń kóshirmesin ıyqqa salǵan Tý toby Uly Otan soǵysynda qaza tapqan jaýyngerlerdiń rýhyna taǵzym jasap, aty ańyzǵa aınalǵan general I.V.Panfılovtyń eskerkishine gúl shoqtaryn qoıdy.
- Panfılovtyń nemeresi bolý úlken jaýapkershilik. Bul qalaı oılap, qalaı ómir súrý keregine mindettep, jaýapkershilik artady. Osy máselege qatysty qaýesetterdiń barlyǵyna qaramastan, Panfılov dıvızııasy Týynyń kóshirmesi Qazaqstan óńirlerin batyldyq sımvoly retinde aralaýy men úshin úlken maqtanysh. Bul estafetany ózim qadaǵaladym. Estafeta bastalǵaly panfılovshylar dıvızııasy Jaýyngerlik Týynyń kóshirmesi Almaty, Qyzylorda, Batys Qazaqstan, Soltústik Qazaqstan oblystarynyń, barlyǵy elimizdiń 16 eldimekeninde boldy. Pandemııa sharany 7 mamyrda aıaqtatpady. Alaıda búgin de aıtýly kún.Búgin shyn máninde tarıhı kún. 14 qazanda Panfılov dıvızııasy alǵash shaıqasty bastaǵan bolatyn. 6 kún ishinde 73-shi polktiń bir batalony qyrylyp qaldy. Bul óte kúrdeli urys boldy. Jaýyngerlik Tý Almaty áskerı-mýzeıine jetkiziledi. Mýzeıde Panfılov dıvızııasynyń zaly qaıta jańǵyrýdan keıin ashylady. Máskeý túbindegi shaıqasqa jeke ekspozısııa ázirlenip jatyr. Tý da sol zaldan laıyq oryn alady, dedi Alýa Baqytjanqyzy.
Taǵzym estafetasynyń jabylýyna arnalǵan saltanatty shara Ulttyq ulannyń 5573 áskerı bóliminde oryn aldy. Alqaly jıynǵa QR Ishki ister organdary men Ulttyq ulan ardagerler keńesiniń tóraǵasy mılısııa general-maıory О́mirzaq Bolsambekov, Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Álibek Serálıev, Ivan Panfılov nemeresi Alýa Baıqadamova, Ulttyq ulan Ardagerler keńesiniń tóraǵasy general-maıor Qalıaqpar Toqyshev, ásker ardageri general-maıor Dáýlet Salhanov jáne ózge de meımandar qatysty. Is-shara barlyq sanıtarlyq-epıdemıologııalyq talaptarǵa saı uıymdastyryldy.
Saptyq alańda Ulttyq ulannyń astanalyq garnızony boıynsha áskerı bólimderiniń jeke quramy, 8-shi gvardııalyq Panfılov dıvızııasy Jaýyngerlik Týynyń kóshirmesin arqalaǵan Tý toby, 28-panfılovshynyń obrazyn beınelegen áskerıler qaz qatar tizildi.
Saltanatty sharanyń shymyldyǵyn Ishki ister organdary men Ulttyq ulan Ardagerler keńesiniń tóraǵasy О́mirzaq Bolsambekov ashyp, soǵysqa qatysqan babalarymyzdyń esimin máńgilik saqtaý jolynda úlken ıgi is ótip otyrǵanyn aıtty:
- Búgingi is-sharanyń mazmuny óte tereńde jatyr. О́zderińiz bilesizder, sońǵy kezde Uly jeńiske Keńes odaǵy emes, ózge kúshter yqpal etti degen qaýesetter tarady. Jeńiske jetken - odaq. Onyń halqy men sarbazdary. Bul shara mamyr aıynda Jeńistiń 75 jyldyǵynda aıaqtalýy kerek edi. Alaıda indettiń saldarynan keshigip, búgin aıaqtaldy. Keńes áskerleri quramynda Jeńisti jaqyndatýǵa myńdaǵan ishki ister organdarynyń qyzmetkerleri men ishki áskerler jaýyngerleri qatysty, Olardyń 16-sy Keńes Odaǵynyń batyry atandy, dedi óz sózinde.
Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Álibek Serálıev estafetanyń mańyzdylyǵyna toqtalyp ótti.
- Ishki ister mınıstri Erlan Turǵymbaevtyń tapsyrmasymen "Biz – Jeńistiń muragerimiz" estafetasy el kóleminde erekshe tebirenispen uıymdastyryldy. Jaýyngerlik Týdyń kóshirmesi el boıynsha Ulttyq ulannyń ár áskerı bóliminde derlik bolyp shyqty. Aksııa kezinde júzdegen is-sharalar men patrıottyq sabaqtar ótkizildi.
Uly Otan soǵysynda týǵan jerin janqııarlyqpen qorǵaǵan qazaqstandyq jaýyngerlerdiń erligine qurmet kórsetý, esimderin el esinde saqtaý, maıdan dalasynda eli úshin qaza bolǵan ár sarbazdyń erligine bas ııý – bizdiń asyl paryzymyz. Osyndaı sharalar arqyly biz jas urpaqty qazaqstandyq patrıottyqqa tárbeıeleımiz. О́tken tarıhqa olardyń rýhyn kóteremiz, dedi óz sózinde Álibek Bolatuly.
Qurmetti meımandardyń quttyqtaý sózderinen keıin 8-gvardııalyq Panfılovshylar dıvızııasynyń Jaýyngerlik Týynyń kóshirmesin Alýa Baıqadamovaǵa saltanatty túrde 5573 áskerı bóliminiń komandıri polkovnık Nurlan Muhamedov tabystady. Artynsha 28 panfılovshy beınesindegi áskerı qyzmetshilerden quralǵan eseptik qorap pen elorda garnızony áskerı qyzmetshileriniń saltanatty sherýi ótkizildi. Shara sońy Ulttyq ulan Án-bı ansambliniń uıymdastyrýyndaǵy teatrlandyrylǵan konserttik qoıylymǵa ulasty.
Aıtyp ótý kerek, Taǵzym estafetasy barysynda keshendi is-sharalar uıymdastyrylǵan bolatyn. Onyń ishinde soǵys jáne eńbek ardagerlerimen kezdesýler, UOS ardagerleri turatyn meken-jaılarda shaǵyn paradtar, jas jetkinshektermen erlik sabaqtary, murajaılyq kórmeler ótkizildi. Ulttyq ulannyń áskerı-úrmeli orkestrleri eldimekender men áskerdiń jekelengen bólinisterinde konsertter qoıdy.
Jalpy sharaǵa Polısııa, Tótenshe jaǵdaılar, Qylmystyq-atqarý júıesi departamentteri, Ulttyq ulannyń óńirlik qolbasshylyqtary, áskerı bólimderi men bólinisteri, IIO men UU ardagerler uıymy, sondaı-aq orta mektep oqýshylary men áskerı-patrıottyq klýbtardyń tárbıelenýshileri, stýdent jastar, quqyqtyq tártip áskeriniń áskerı bólimderi ornalasqan qalalardaǵy jergilikti qoǵamdyq uıymdardyń ókilderi qatysty.