Dintanýshylardyń úshinshi forýmy

Keshe Astana qalasynda Qazaqstan Respýblıkasy Din isteri agenttiginiń uıymdastyrýymen Qazaqstan dintanýshylarynyń «Zaıyrly memlekettegi dinniń róli» taqyrybynda úshinshi forýmy bolyp ótti.

Keshe Astana qalasynda Qazaqstan Respýblıkasy Din isteri agenttiginiń uıymdastyrýymen Qazaqstan dintanýshylarynyń «Zaıyrly memlekettegi dinniń róli» taqyrybynda úshinshi forýmy bolyp ótti.

Is-sharaǵa memlekettik or­gan­dar­dyń ókilderi, Parlament depýtattary, belgili qazaq­standyq din­tanýshy ǵalymdar, teologtar, orta mektepterdiń «Dintaný negiz­deri» pániniń muǵalimderi, joǵary oqý oryndarynyń oqytýshylary, dinı bir­lestikterdiń, qoǵamdyq uıym­dar men bu­qaralyq aqparat qural­da­ry­nyń ókilderi qatysyp, sóz sóıledi.

Qazaqstan dintanýshylarynyń jyl saıynǵy forýmy bıyl ple­narlyq otyrystan bastalyp, onda forýmnyń negizgi taqyryby talqyǵa salyndy. Odan keıin tórt seksııalyq otyrys jalǵasyn taýyp, onda zaıyrly memlekettegi dinı saıasattyń mańyzdy máse­le­leri qozǵaldy.

Forýmda Qazaqstan Respýb­lı­kasy Ákimshiligi Basshysynyń orynbasary Baǵlan Maılybaev, Qazaqstan Respýblıkasy Din isteri agenttiginiń tóraǵasy Marat Ázilhanov quttyqtaý sóz sóılep, óz baıandamalarynda zaıyrly memlekettegi dinniń róline basa nazar aýdardy.

Sondaı-aq, plenarlyq otyrys­ta «Din­tanýshylar kongresi» qo­ǵam­dyq birlestiginiń tóraǵasy, L.N.Gý­mılev atyndaǵy EUÝ fıloso­fııa kafedrasynyń meńgerýshisi Ǵa­rıfolla Esim «Qazirgi zaman­daǵy dinı ahýal jáne zaıyrly mem­lekettegi dintanýshylardyń róli» taqyrybynda sóz sóılep, Par­lament Májilisiniń depýtaty Ka­mal Burhanov Qazaqstandaǵy dinı to­leranttylyq jaıynda áńgime qozǵady.

Forýmnyń maqsaty din sala­syndaǵy memlekettik saıasatty iske asyrý boıynsha birigip qyzmet etýge eldegi otandyq ǵylymı jáne sarapshylar qaýymdastyǵynyń nazaryn aýdarý, jalǵan dinı aǵymdardyń, sondaı-aq, ekstremızm men terrorızmniń yqpalyn tómendetý faktory retindegi dintaný biliminiń sapasyn joǵa­rylatýdyń ınnovasııalyq joldaryn anyqtaý, dinı aǵartý men halyqtyń dinı saýatyn kóterýdegi bilim berý júıesiniń orny men rólin tabý jáne anyqtaý boldy.

«Zaıyrly memlekettiń din salasyndaǵy saıasatyn iske asyrý: aımaqtyq tájirıbe jáne problemalar» atty birinshi seksııada eldegi konfessııaaralyq turaqtylyqty saqtaý boıynsha memlekettik saıasatty iske asyrý kezinde týyndaıtyn kúrdeli máseleler talqylandy.

«Qazaqstannyń zaıyrly oqý oryndaryn­da­ǵy dintaný negizderin oqytý sapasyn arttyrý: ádisnamalyq jáne praktıkalyq aspektiler» atty ekinshi seksııada dintaný negizderin orta jáne joǵary oqý oryndaryna mańyzdy oqý pánderiniń biri retinde engizý jolymen jastar ortasynda dinı saýattylyq deńgeıin kóterýdiń róli men mańyzy talqyǵa salyndy.

«Zaıyrly memlekettegi dinı radıkalızm­niń aldyn alý ádis­na­malary» atty úshinshi seksııanyń qatysýshylary dinı radıkaldy aǵymdardyń qyzmetterine qatysty ózekti máselelerdi, sondaı-aq, qoǵamda paıda bola­tyn qaýip-qaterlerdi der kezinde anyqtaý tetikteri men olardy sheshý joldaryn ortaǵa saldy.

«Qazirgi Qazaqstan aýmaǵyn­daǵy ıslamnyń tarıhy» atty tór­tinshi seksııada Qazaqstan úshin dástúrli bolyp tabylatyn­ súnnıttik ıslamnyń hanafı máz­habyn qazaq halqynyń salt-dástúrleri men ádet-ǵuryptaryn esepke ala otyryp nasıhattaý qajettigi jaıynda aıtyldy.

Bıyl tuńǵysh ret Qazaqstan dintaný­shy­larynyń forýmynda Dintanýshylar kongresi qurmet gramotalarymen jáne joǵary oqý oryndarynyń úzdik oqytýshylary men mektepterdiń «Dintaný negizderi» pániniń muǵalimderi estelik syılyqtarmen marapattaldy.

Forýmdaǵy basty oqıǵalardyń biri – «E-Islam» aqparattyq-aǵartýshylyq ǵalamtor-portaly­nyń tusaýkeseri boldy. Din isteri agenttiginiń tóraǵasy Marat Ázilhanov bul portal Memleket basshysy Nursultan Nazarbaevtyń Islam Yntymaqtastyǵy Uıymyna múshe memleketter Syrtqy ister mınıstrleriniń 38-shi otyrysynyń qorytyndylary boıynsha bergen tapsyrmasyn oryndaý maqsatynda daıyndalǵanyn aıtty. «E-Islam» ǵalamtor-portaly kópshilik qazaqstandyq aýdıtorııaǵa Qazaqstandaǵy ıslam týraly tolyqqandy aqparat berýge arnalǵan.

Odan keıin Din isteri agent­tiginiń Aqparattyq-konsýl­ta­tıvtik ortalyǵy janynda qyz­met etetin «Qaýyrt jeli – 144» jobasynyń da tanystyrylymy ótti. Bul joba Din isteri agent­tiginiń tapsyrysy boıynsha júzege asyryldy.

Jobanyń maqsaty azamattar men uıymdardan dinı salaǵa qatysty barlyq máseleler boıynsha aqparattardy qabyldaý, sonymen birge, destrýktıvti dinı aǵymdardyń qyzmetinen zardap shekkenderge konsýltasııalyq jáne psıhologııalyq kómek kórsetý bolyp tabylady. Azamattar «Qaýyrt jeliniń» 114 nómirine Qazaqstannyń barlyq aımaǵynan táýlik boıy qońyraý shala alady. Ortalyqta kásibı psıhologtar, zańgerler, dintanýshylar jumys jasaıdy. Keńes berý tegin ári qupııa túrde júrgiziledi.

Sáýlebek BIRJAN.