Karantın rejımine qaramastan oblys ortalyǵynda qurylys jumystary toqtaǵan joq. Atqarylyp jatqan jumystardy óz kózimen kórip shyqqan oblys basshysy О́mirzaq Shókeev eń aldymen turǵyn úılerdiń sapasyna mán berdi. Qurylysty der kezinde aıaqtaýdy mindettedi, dep habarlaıdy Egemen.kz oblys ákiminiń baspasóz qyzmetine silteme jasap.
Túrkistan qalasynyń ákimshilik-iskerlik ortalyǵyndaǵy 3 myńǵa jýyq páterli 7 qabatty 24 turǵyn úıdiń 22-iń qurylysyn aıaqtaýy qarasha aıyna josparlanǵan. Buǵan qosa, 12 qabatty 45 turǵyn úıdiń qabyrǵasy kóterilýde. Bul úılerdi paıdalanýǵa berý 2021 jylǵa josparlanǵan. Túrkistandyqtardy baspanamen qamtamasyz etý úshin ıpotekalyq turǵyn úılerdiń qatary artpaq.
Qurylysy qarqyn alǵan álemde teńdesi joq «Kerýen Saraı» týrıstik kesheninde Shyǵys bazary, etnıkalyq úlgidegi meıramhanalar men qonaq úıler salynýda. Kópsalaly saraıda kóne shyǵys teatry, ulttyq dámhanalar, jasandy kólder, saıabaqtar salý josparda. Sheberler kóshesinde kádesyılar satatyn sheberhanalar sap túzeıdi.
Túrkistan qalasynyń ortalyǵyndaǵy «Jelilik saıabaq», «Attraksıondar saıabaǵy», «Oqýshylar saraıy», «Kongress ortalyǵy», «Jabyq basseıni bar sport saraıy», «Ortalyq stadıon» jáne «Q.A.Iаsaýı murajaıy», «Dramateatr» ǵımarattary bıyl el ıgiligine beriletin bolady. Budan ózge, oblys ortalyǵyndaǵy rýhanı-mádenı ortalyqty abattandyrý maqsatynda iri jobalar qolǵa alynyp, qurylys jumystary júrgizilýde.