Abaı atyndaǵy Qazaq ulttyq pedagogıkalyq ýnıversıtetinde "Abaı shyǵarmalarynyń túrki áleminde zerttelýi men nasıhattalýy" ǵylymı konferensııa aıasynda Nemat Kelimbetov atyndaǵy Túrkitaný ortalyǵy Abaıdyń 175 jyldyq mereıtoıyna oraı "Abaı Qunanbaıuly. Ǵaqlııa kitaby" kitabyn tanystyrdy, dep habarlaıdy Egemen.kz
Túrkitaný ǵylymy salasynda ǵylymı jobalar jasap, túrki áleminiń tili, ádebıeti, tarıhy jáne mádenıetine qatysty konferensııalar men semınarlar uıymdastyrý, ǵylymı eńbekterdi jaryqqa shyǵarýdy maqsat etetin Nemat Kelimbetov atyndaǵy Túrkitaný ortalyǵy 2013 jyly ashylǵan bolatyn.
Ýnıversıtettiń "Ulaǵat" baspasynan jaryqqa shyqqan kitapta 1907 jyly Múrseıit Bikeuly hatqa túsirgen Abaı qara sózderiniń qoljazbasy, transkrıpsııasy jáne grammatıkalyq ındeksi berilgen. Eńbekte budan bólek XX ǵasyr basyndaǵy qoljazbalardyń tildik erekshelikterine sıpattama jasalyp, Abaı qara sózderiniń tili taldanǵan. Bul jumys qazirgi qazaq tiline sáıkes birneshe ret óńdelip ózgertilgen qara sózderdiń túpnusqasymen birge usynylyp, jańasha oqylýy jáne grammatıkalyq ındeksiniń berilýimen erekshelenedi. Kitap avtory túrkııalyq ǵalym PhD doktor Erjan Petek. Kitapty túrik tilinen aýdaryp, ǵylymı redaksııasyn jasaǵan Nemat Kelimbetov atyndaǵy Túrkitaný ortalyǵynyń bas ǵylymı qyzmetkerleri fılologııa ǵylymynyń doktory, professor Sherýbaı Qurmanbaıuly jáne PhD doktor Marlen Ádilov.
Professor Sherýbaı Qurmanbaıuly Abaı tilindegi eski qazaq jazba jáne aýyzeki tiline qatysty nusqalar men kirme elementterdiń dybystyq ózgerisiniń tarıhy taldanyp usynylǵan jınaqta morfologııalyq erekshelikter, kirme sózderdiń qazaqy formasy túsindirilgendigi jaıynda aıtyp ótse, Túrkistanda tórt jyldaı ǵylymı zertteýmen aınalysqan túrkııalyq ǵalym, PhD doktor Erjan Petek osy ýaqyt ishinde qazaq tili jáne ádebıetimen qatar jyraýlar poezııasymen tereń tanystyǵy jaıynda aıta kele Abaı Qunanbaıulynyń 175 jyldyǵyna óz úlesin qosý maqsatynda aqyn jaıyndaǵy eńbekti jazǵandyǵy týraly baıandady.