«Astana Opera» teatrynyń ánshisi Saltanat Ahmetova Germanııadaǵy eń aıtýly baıqaýlardyń biri – «Neue Stimmen»-ge qatysyp, Gıýterslodaǵy «Klassıkalyq kúz» («Klassik Herbst in Gutersloh Forderprei») syılyǵyn ıelendi.
«Astana Opera» teatrynyń ánshisi Saltanat Ahmetova Germanııadaǵy eń aıtýly baıqaýlardyń biri – «Neue Stimmen»-ge qatysyp, Gıýterslodaǵy «Klassıkalyq kúz» («Klassik Herbst in Gutersloh Forderprei») syılyǵyn ıelendi.
Aıta ketý kerek, bul baıqaýǵa álemniń ár túkpirinen 1428 adam ótinim bildirgen, al olardy irikteı kelgende bar-joǵy 40 ánshi ǵana baıqaý talabyna laıyqty dep tabylǵan. «Myńnan – tulpar, júzden – júırik», demekshi, eń sońǵy týrǵa tek 9 ánshi ǵana súrinbeı jetti. Shashasyna shań juqpaǵan sol toǵyzdyqtyń ishinde qazaqtyń Saltanat esimdi arý qyzy baryn estip, qýanyp jatyrmyz. Saltanat Ahmetova irikteý kezeńinde G.Gendeldiń «Iýlıı Sezar» operasynan Kleopatranyń arııasyn oryndap shyqty. «Bul baıqaýǵa qatysý úshin aldymen qazylar alqasy úsh aı boıy irikteý júrgizdi. Buǵan dúnıe júzinen qanshama talantty jastar qatysty. Men Berlındegi irikteýden óttim. Qazaqstannan bul saıysqa ánshilerdiń birinshi ret qatysýy, deıdi S. Ahmetova. – Qatysýshylardy óte joǵary deńgeıdegi pıanıster súıemeldep otyrdy. Qazylar alqasynyń quramynda Eýropadaǵy, Amerıkadaǵy iri-iri teatrlardyń basshylary men basqa da agenttikterdiń dırektorlary boldy. Mundaı baıqaýlardyń, ásirese, jastar úshin kómegi asa zor. Búkil álemge týǵan elińniń dańqyn óz óneriń arqyly asyrýdan asqan bıik shyń joq shyǵar, sirá. Ekinshi bir jaǵynan alyp qaraǵanda, ol Eýropaǵa bastap baratyn joldyń kilti sekildi. Jáne de myqtylarmen básekelese kele ózińe syn kózben qaraýdy úırenesiń, ári bul ózgeniń paıdaly, jaqsy jaqtaryn kádeńe jaratýyńa múmkindik týǵyzatyn alań. О́ner joly – ómir boıy kórgen-bilgenińdi sanaǵa toqýmen ótetin mektep».
Ánshi jartylaı fınalda Mosarttyń «Sıqyrly fleıta» operasynan Tún patshaıymy arııasyn shyrqasa, sońǵy týrda eki arııa – Gaetano Donısettıdiń «Lıýchııadı Lammermýr» operasynan Lıýchııanyń, sosyn Massneniń «Manon» operasynan Gavottyń arııalaryn sátti oryndaǵan.
Opera ánshileri týraly syrttaı túrli qyzyq áńgimelerdi estip qalyp jatamyz. Mysaly, bireýler daýysy ashylýy úshin jumyrtqany shıkideı jutsa, endi bireýleri tynys joldaryna arnalǵan jattyǵýdy oryndap baryp, kóp aldyna shyǵýdy jón sanaıdy eken. Al dáldikpen ómir súrip, naqtylyqty súıetin nemisterdi bizdiń qyzymyz nesimen tánti etti eken dep turǵan shyǵarsyz ishteı.Saltanattyń aıtýynsha, vokaldyq gıgıenany myqtap ustanǵan adam esh jerde utylmaıdy, ıaǵnı, daýys anyq ári shıraq shyǵý úshin basyńdy erterek jastyqqa qoıyp, erte turý óte mańyzdy. Tabysqa jetýdiń taǵy bir qupııasyn oryndaýdyń esh qıyndyǵy joq, ol óte qarapaıym – tamaqqa sýyq tıgizip almaý kerek. «Sonda da bolsa árkimniń eshkimge kóp syryn jaıa bermeıtin bólek qupııalary bolady. Bul qandaı syr ekenin qazir de búkpesiz aıta alamyn. Bireýler meıli quptar, meıli quptamas, keshkisin mindetti túrde atam qazaqtyń dástúrimen et jeımin. Osy adamǵa ájeptáýir kúsh beredi. Aıtyp qoıaıyn, bul ustazym – Qazaqstannyń halyq ártisi Qorlan Qalılambekovanyń bergen keńesi. Biraq árıne, ánshi úshin aýtotrenıngtiń de mańyzy óte zor bolyp esepteledi. Mysaly, eger ishteı ózińdi shokoladtyń bóligi kómektesip, seni baqytty etedi degenge sene bilseń, ol dál solaı bolyp shyǵýy bek múmkin», – deıdi Saltanat.
Jetiqara QOŃYR.
ASTANA.