Qazaqstan Respýblıkasynyń Tuńǵysh Prezıdenti – Elbasy kitaphanasy, «Qulanshy» zamanaýı óner ortalyǵy, Qazaqstannyń shyǵarmashylyq bastaýlary men mádenı murasyn qoldaý jónindegi «Baıta» qaıyrymdylyq qory, Nur-Sultan qalalyq bilim basqarmasy, Pedagog sýretshiler halyqaralyq odaǵynyń (Reseı) Qazaqstandaǵy ókildigi, Eýrazııa óner akademııasy, Balalar kórkemsýret mektebi – Nur-Sultan qalasy IýNESKO klýby; «ForteBank» AQ men «Leonardo» hobbı gıpermarketiniń qoldaýymen uıymdastyrylǵan «Týǵan jerim» atty balalar men jasóspirimder shyǵarmashylyǵynyń XV halyqaralyq baıqaýy óz jeńimpazdaryn anyqtady.
Atalǵan baıqaýdy 2004 jyldan bastap Qazaqstan Respýblıkasy Tuńǵysh Prezıdenti – Elbasy mýzeıinde ótkizý dástúrge aınalyp, 2006 jyly bul shara jańa jobalyq deńgeıge kóterilgen bolatyn. Mundaǵy maqsat – álem balalaryn Qazaqstannyń mádenıeti jáne ónerimen tanystyrý, olardyń jeke qabiletin, shyǵarmashylyq áleýetin tereńdetý.
Elbasy kitaphanasy dırektorynyń orynbasary Kúláısha Aqtaevanyń aıtýyna qaraǵanda, atalǵan bastama balalar shyǵarmashylyǵyn qoldaýǵa baǵyttalǵan Tuńǵysh Prezıdent mýzeıiniń arnaıy jobasy. Al balalar shyǵarmashylyǵynyń stıldik ereksheligine toqtalsaq, keskindeme men músin, sándik-qoldanbaly óner úlgileri, kórkem kartınalar engen.
Bıylǵy baıqaýǵa Qazaqstan, Reseı, Tatarstan, Bashqurtstan, О́zbekstan, Ýkraına, Ázerbaıjan, Belarýs elderinen 400-den astam jumys joldanypty. Qazylar alqasynyń múshesi, «Qulanshy» zamanaýı óner ortalyǵynyń dırektory Láılá Mahattyń aıtýynsha, jas jetkinshekter shyǵarmashylyǵyna baǵa berý ońaı emes. Munda ár balanyń mańdaı teri men kóz maıy sińgen. Bul retki baıqaýǵa joldanǵan jumystar kóńilge tolymdy jáne qatysýshylardyń kóptigi men jan-jaqtylyǵy tańǵaldyrady. Osy oraıda, óz jumystaryn joldaǵan barlyq qatysýshylarǵa rahmet aıtamyn, quttyqtaımyn, dedi ol.
Sonymen 8-10 jas sanatyndaǵylar arasynan: bas júldeni tatarstandyq Matveı Krylov qanjyǵalasa, kelesi oryndardy: Sofııa Morgýn (Ýkraına), Alekseı Lıtvınsev (Belarýs), Alına Porhacheva (Reseı), Sofııa Nıkýlına (Dolgoprýdnyı, Reseı), Valerııa Alekseenko (Barnaýl, Reseı), Súrııa Sapar (Nur-Sultan, Qazaqstan) ıe boldy.
11-13 jas sanatyndaǵylar arasynan: bas júldege Dilnur Aqpaeva (Sol-Ilesk, Reseı) men Vıktorııa Saveleva (Magnıtogorsk, Reseı) ıe bolsa, kelesi oryndar Anastasııa Shelıapa (Sverdlov oblysy, Reseı), Jansaıa Berdibaı (Shymkent, Qazaqstan), Saǵdat Toqtaeva (Shahrısabz, О́zbekstan) t.b. buıyrdy.
14-16 jas sanatyndaǵylar arasynan: bas júlde Sevınch Botırov (Shahrısabz, О́zbekstan), Aıym Seıilhanǵa (Aqtóbe, Qazaqstan) buıyrsa, júldegerler retinde Aleksandra Efremova (Ekaterınbýrg, Reseı), Ekaterına Krıvleva (Rýdnyı, Qazaqstan), Raı Nına (Volgodonsk, Reseı) tanyldy.
Uıymdastyrýshylar tarapynan jeńimpazdar men júldegerlerge onlaın túrde dıplom tabystalyp, alǵan syılyqtary poshta arqyly jiberiletin boldy.
Baıqaýdy qortyndylap sóz sóılegen «Baıta» shyǵarmashylyq bastamalar men mádenı mura qaıyrymdylyq qorynyń dırektory Svetlana Mahat, jas talanttarǵa tabys tileı otyryp, shyǵarmashylyq jumysta bıik belesterden kórine berýine tilektestik tanytty.
Baıqaýda úzdik dep tanylǵan jumystarǵa Tuńǵysh Prezıdent – Elbasy kitaphanasy mýzeıiniń kórme zalynan oryn buıyrdy. Kópshilik bul týyndylardy onlaın arqyly tamashalaı alady.