Memlekettik qyzmet isteri agenttiginiń tóraǵasy Anar Jaılǵanova «Ortalyq Azııadaǵy turaqty damý maqsattary jáne COVID-19 syn-qaterleri» atty halyqaralyq onlaın-konferensııaǵa qatysty.
Agenttik tóraǵasy konferensııanyń «memlekettik basqarý jáne qazirgi ýaqyttaǵy senim» taqyrybyndaǵy paneldik sessııasynda sóz sóılep, pandemııa kezinde memlekettik apparattyń tıimdi jumys isteýi úshin uıymdastyrylǵan is-sharalar týraly aıtty.
«Memleket basshysy Q.Toqaev atap ótkendeı, «Pandemııa barlyq memleketter úshin stress-testke aınaldy». Alaıda, biz, kóptegen basqa elder sııaqty, jınaqtalǵan tájirıbeni eskere otyryp, óz jumysymyzdy bir júıege qoıyp, qaıta qura aldyq.
Áleýmettik-ekonomıkalyq turaqtylyqty qamtamasyz etý jáne turǵyndardy qoldaý boıynsha birqatar sharalar qabyldandy. Bul baǵytqa 450 mlrd. tenge bólindi, Elbasy, Tuńǵysh Prezıdent N.Á.Nazarbaevtyń bastamasy boıynsha «Birgemiz» qorynyń birjolǵy qarjylaı qoldaýymen 550 myńnan astam otbasyǵa qoldaý kórsetildi», - dedi Anar Jaılǵanova.
Sonymen qatar, MQIA basshysy pandemııa kezeńinde qysqa merzimde memlekettik apparattyń úzdiksiz jumys isteýin qamtamasyz etýge jáne memlekettik qyzmetshilerdiń densaýlyǵyn saqtaýǵa baǵyttalǵan jumys tıisti deńgeıde júrgizilgenin atap ótti.
Sondaı-aq, Agenttik tóraǵasy: «Memlekettik apparatty jedel sıfrlandyrý, onyń fýnksııalaryn ońtaılandyrý, normashyǵarmashylyq jumys, memlekettik josparlaýdy qaıta qaraý jáne t. b. boıynsha sharalar qabyldanýda.
Sonymen birge, qazirgi pandemııa - tıimdi memlekettik basqarý men kommýnıkasııalar daǵdarysqa qarsy sharalar tabysynyń negizgi elementteri bolyp tabylatynyn kórsetti»-dedi.
Atalǵan onlaın-konferensııa Nazarbaev ýnıversıtetiniń joǵary memlekettik saıasat mektebi men Memlekettik qyzmet salasyndaǵy Astana habynyń bastamasy boıynsha ótkizildi.
Is-shara qatysýshylarǵa Covid-19-dan keıingi kezeńde Ortalyq Azııadaǵy turaqty damý maqsattaryna baılanysty problemalardy talqylaýǵa jáne sheshimder tabýǵa, sondaı-aq ǵalymdar men praktıkter arasynda kommýnıkatıvtik alań qurýǵa múmkindik berýge arnalǵan.
Atalǵan onlaın-sessııaǵa BUUDB-nyń Qazaqstandaǵy Turaqty ókili Iаkýp Berısh, AQSh, Ulybrıtanııa, Sıngapýr, Italııa, Grekııa, Lıtva jáne Grýzııa sarapshylary men ǵalymdary qatysty.