Aýyl sharýashylyǵy mınıstri Saparhan Omarov Qazaqstanda ıntensıvti jemis baqtaryn otyrǵyzý jáne qaıta óńdeý kásipornyn salýǵa baǵyttalǵan ınvestısııalyq joba boıynsha Túrkııanyń iri kompanııa basshysymen kelissózder júrgizdi, dep habarlaıdy Egemen.kz mınıstrliktiń baspasóz qyzmetine silteme jasap.
Túrkııa Respýblıkasyna jumys sapary aıasynda QR AShM basshysy Nıgde qalasynda ornalasqan "Göknur Gıda" kompanııasynyń óndiristik nysandaryn aralady.
Saparhan Omarov zaýyttaǵy jemis shyryndary, pıýre, konsentrat jáne bıogaz óndirisiniń tehnologııalyq jelisimen tanysty. Sonymen qatar, "Göknur Gıda" kompanııasynyń quryltaıshysy Osman Aslanalımen Qazaqstanda ıntensıvti jemis baqtaryn bólýdi jáne oǵan uqsas tehnologııalyq óndiristik jelini qurýdy kózdeıtin "ınvestısııalyq" jobany iske asyrý máseleleri boıynsha kelissózder ótkizdi.
Atalmysh joba Qazaqstan Respýblıkasynyń Túrkııa Respýblıkasyndaǵy elshiligimen jáne "Kazakh Invest" UK" AQ-men birlesip júzege asyrylady.
"Göknur Gıda" kompanııasy 1993 jyly qurylǵan, Túrkııanyń 500 iri kompanııalarynyń qataryna kiredi. 2500 gektar jeke jemis baqshasy, AQSh, Eýropa, Qytaı jáne basqa elderde 5 jemis saqtaý qoımalary bar. Kompanııanyń aınalymy 130 mln AQSh dollaryn quraıdy.
Jobany iske asyrý úshin áleýetti óńirler retinde Almaty, Jambyl jáne Túrkistan oblystary qarastyrylýda. Qazir qazaqstandyq seriktester "Göknur Gıda" kompanııasymen tıisti kelisimderge qol jetkizdi. Jobanyń quny 204 mln AQSh dollaryn quraıdy. Investısııalyq joba aıasynda 500 jumys ornyn ashý kózdelýde.