Túrkistan oblysynda koronavırýs ınfeksııasynyń yqtımal beleń alý jaǵdaılary eskerile otyryp, emdeý mekemelerinde jumys jospary bekitilgen. Jalpy, medısınalyq uıymdarda 6000-ǵa jýyq tósek orny qarastyrylǵan. Oblystaǵy medısınalyq mekemelerdiń pandemııanyń bolýy múmkin ekinshi tolqynyna daıyndyq barysymen tanysý maqsatynda BAQ ókilderine arnalyp press-týr uıymdastyryldy, dep habarlaıdy Egemen.kz.
Aıta keterligi, aýdan-qalalardaǵy aýrýhanalardyń materıaldy-tehnıkalyq bazasy jaqsartylyp, ókpeni jasandy jeldetý apparattar sany 65 paıyzǵa artqan. Sonymen qatar, 80 oksıgen apparaty alynyp, ottegi konsentratorlarynyń sany 900 birlikke jetken. Budan ózge, aýrýhana aımaqtarynan salynǵan ottegi stansııalary eki esege artqan.
Emdeý mekemesin tolyǵymen ottegimen qamtamasyz etetin stansııanyń biri Kentaý qalalyq ortalyq aýrýhanasynda ornatylǵan. Aýrýhana jańadan ashylǵan gemodıalız ortalyǵy, kompıýterlik tomografııa, sandyq rentgen apparaty, jańa úlgidegi ÝDZ men zerthanalyq dıagnostıkalyq apparattarymen jabdyqtalǵan.
"Indettiń birinshi tolqynynda oryn alǵan kemshilikterdi boldyrmaý úshin búginde barlyq tıisti jaǵdaılar jasalýda. Atap aıtsaq, 2-3 aıǵa jetetin aýrýǵa qarsy qoldanylatyn dári-dármek qory jasaqtaldy. Qajetti qural-jabdyqtar jetkilikti deńgeıde alyndy. Endi oblystyq medısınalyq jedel-járdem qyzmeti jyl sońyna deıin qosymsha 120 kólikpen qamtylatyn bolady. Shalǵaı aýyldarǵa 12 jyljymaly medısınalyq keshen alynýda", – dedi oblystyq qoǵamdyq densaýlyq basqarmasynyń basshysy Marat Pashımov.
Sonymen qatar Arys qalalyq ortalyq aýrýhanasynda da Covid-19 ınfeksııasymen kúres jumystary qolǵa alynǵan. Medısınalyq uıym jeke qorǵanys kıimderi men dári-dármektiń eki aılyq qorymen qamtamasyz etilgen. Jansaqtaý bóliminde 9 ókpeni jasandy jeldetý apparaty, qosymsha ottegi oksıgeneratorlary jáne basqa da qajetti medısınalyq qural-jabdyqtar ornatylǵan. Sondaı-aq, koronavırýs ınfeksııasymen kúreske jumyldyrylǵan 19 mobıldi top halyqqa qyzmet kórsetýde.
Al Ordabasy aýdandyq ortalyq aýrýhanasynda koronavırýs ınfeksııasyn anyqtaıtyn zerthana iske qosylǵan. PTR synamasy boıynsha anyqtaıtyn zerthana táýligine 500-ge jýyq test qabyldaýǵa múmkindigi bar. Aldaǵy ýaqytta Arys qalasy men Báıdibek aýdandarynan synama qabyldaý josparlanýda. Túrkistan oblysy boıynsha mundaı 12 zerthana jumys isteýde. Sonymen qatar, aýdanda eski aýrýhana ǵımaraty tolyq kúrdeli jóndeýden ótkizilip, 100 tósek oryndy provızorlyq, 10 oryndy observasııalyq bólim ashylǵan. Qazirgi tańda emdeý mekemesi jeke ottegi stansııasy, 23 ókpeni jasandy jeldetý apparatymen jasaqtalǵan.
Aıta keteıik, aımaqta búginde jalpy 23 429 medısına qyzmetkeri bar. Onyń 5000-nan astamy dárigerler, qalǵandary orta býyn mamandary. Aq halatty jandardyń eren eńbeginiń arqasynda óńirde qaýipti indetti juqtyrǵan 3331 naýqas tolyq jazylyp shyqqan. Jalpy, pandemııa beleń alǵaly oblysta Covid-19 ınfeksııasy rastalǵan 3395 jaǵdaı tirkeldi. Olardyń 2355-de aýrý sımptomsyz ótken.