Bolat О́temuratov qory Túrkistan oblysy Maqtaaral aýdanyndaǵy Myrzakent qalasynda 150 úıdiń qurylysyn aıaqtady. Olar osy óńirde ótken kóktemde bógettiń buzylýynan bolǵan sý tasqynynan zardap shekkenderge arnaldy. Búgin QR vıse-mınıstri Roman Sklıar men Túrkistan oblysynyń ákimi О́mirzaq Shókeevtiń qatysýymen úılerdiń kiltteri bolashaq turǵyndaryna berildi, dep habarlaıdy Egemen.kz.
"Bizdiń aksıoner Bolat О́temuratov qazaqstandyq mesenattar ishinen alǵashqy bolyp kóktemde bolǵan apattan zardap shekkenderge kómek kórsetýdi sheshti. Ol 6 mln AQSh dollaryn bólip, olardy apat saldarynan baspanasyz qalǵan 150 otbasyna arnap úı salýǵa jumsady. Bul óńirdiń qaıta qurylýyna salynǵan eń qomaqty úles jáne salynǵan úılerdiń eń joǵarǵy sany. Jobany iske asyrý barysynda biz eń jaqsy materıaldy tańdap, jumys sapasyn qatal qadaǵaladyq. Pandemııa men karantınge baılanysty qıyndyqtarǵa qaramastan, tórt aıdyń ishinde jobany oryndadyq. Aıta ketý jón, bizge ótken jylǵy Arys qalasyndaǵy tájirıbe kómek boldy, ol qalada da biz jarylystardan zardap shekken 100 otbasyna úı salyp berdik", - dedi Erlan Ospanov, "Vernyı Kapıtal" kompanııalar tobynyń bas dırektory.
Kólemi 100 sharshy metr úsh bólmeli úıler Myrzakenttiń jańa, perspektıvti aýdanynda salynǵan, munda Dostyq, Jańaturmys jáne Jeńis aýyldarynyń turǵyndary kóshiriledi. Jańa shaǵyn aýdanǵa barlyq kommýnıkasııalar tartylǵan, bala baqshanyń jáne mekteptiń qurylysy bastalyp qoıdy.
Túrkistan oblysynyń ákimi О́mirzaq Shókeev búkil eldiń qoldaýymen aımaq barlyq qıyndyqtardy eńsergenin atap ótti. "Maqtaaral aýdanynyń turǵyndary memlekettik deńgeıde qoldaý aldy. Eshkim de nazardan tys qalǵan joq. Búkil el kómekke keldi. Osymen barlyq qıyndyqtar artta qalyp, aldyda sizderdi tek qýanyshty jáne kóńildi oqıǵalar kútsin. Taǵy da sizderdi jańa úılerińizben shyn júrekten quttyqtaımyn", - dedi oblys basshysy.
Jeńis aýylynyń turǵyny, tórt balanyń ákesi jańa qonystanǵan Kenje Tleýbaev mamyr aıynyń basyndaǵy sol qıyn kúnderdi eske aldy. "Eki kún ishinde búkil aýyldy sý shaıyp ketti, bizdiń úıden, kórshilerimizdiń úılerinen eshteńe qalmady. Biz bárinen aıyrylyp, tolyqtaı shyǵynǵa battyq. Mine, búgin, bes aıdan keıin, meni qýanysh basty. Bizdiń memleketke, halqymyzǵa, bizge qıyn kezde kómek qolyn sozyp, kómektesken azamattarǵa alǵys pen qýanysh basty", - dedi ol.
Imantaevtar otbasy alǵashqylardyń biri bolyp jańa úıge qonystandy. Bes balanyń ákesi Talǵat óz sezimin jasyra almady.
"Elbasyna, Prezıdentke, ákimderge, Bolat О́temuratovtyń qoryna, bizge qol ushyn sozyp, qoldaý kórsetkenderdiń barlyǵyna myń alǵys. Bizde, búkil elde tek qýanyshty oqıǵalar bolǵanyn qalaımyz!" - dedi ol.
"Qaıyrymdylyq jobamyzdy biz Túrkistan oblysynyń ákimdigimen birlesip iske asyrdyq. Ákimdiktegi áriptesterimizge kómek úshin alǵysymyzdy bildiremiz. Aramyzdaǵy yntymaqtastyq jeke bastama men memlekettik qoldaýdyń áleýmettik problemalardy birlesip nátıjeli sheshýdiń sátti úlgisi boldy", - dedi Marat Aıtmaǵambetov, Bolat О́temuratov Qorynyń dırektory.
О́tken jyly Bolat О́temuratov Qory Qyzylorda qalasynda 100 kópbalaly otbasy úshin jáne Arys qalasynda jarylystardan zardap shekken 100 otbasy úshin turǵyn úı salýdy qarjylandyrdy. Jobalarǵa jumsalǵan jalpy soma 1,3 mlrd teńgeni qurady.