Memlekettik satyp alý júıesinde jeń ushynan jalǵasqan túrli zańsyzdyqtardyń tyıylmaı otyrǵany jasyryn emes. Úkimettiń keńeıtilgen májilisinde Elbasy osy máselege aıryqsha nazar aýdaryp, bılik oryndarynyń tenderlerde «bógde» jetkizýshilerdiń qatysýyna múmkindik bermeıtin sharttar belgilep, óz «adamdaryn» ótkizip jiberetin keleńsizdikterdi qatty synǵa alǵan bolatyn. Biz tómende buratartýshylyqpen uıymdastyrylǵan memlekettik satyp alý arqyly kásipkerdi nápaqasynan aıyryp, tentiretip jibere jazdaǵan memlekettik qyzmetkerlerdiń is-áreketteri jaıly áńgimelemekpiz.
Memlekettik satyp alý júıesinde jeń ushynan jalǵasqan túrli zańsyzdyqtardyń tyıylmaı otyrǵany jasyryn emes. Úkimettiń keńeıtilgen májilisinde Elbasy osy máselege aıryqsha nazar aýdaryp, bılik oryndarynyń tenderlerde «bógde» jetkizýshilerdiń qatysýyna múmkindik bermeıtin sharttar belgilep, óz «adamdaryn» ótkizip jiberetin keleńsizdikterdi qatty synǵa alǵan bolatyn. Biz tómende buratartýshylyqpen uıymdastyrylǵan memlekettik satyp alý arqyly kásipkerdi nápaqasynan aıyryp, tentiretip jibere jazdaǵan memlekettik qyzmetkerlerdiń is-áreketteri jaıly áńgimelemekpiz.
«Nur Otan» partııasy oblystyq fılıalynyń tóraǵasy, aımaq basshysy Samat Eskendirovtiń qoǵamdyq qabyldaýyna aryzdana kelgenderdiń biri «Petropavl-Lıft» JShS-niń dırektory Sergeı Sarkov boldy. Ol óz sózinde jeke kásibin damytýda qoldan jasalǵan kedergilerge kezdesip otyrǵanyn aıta kelip, arasha surady. Sheneýnikterdiń tenderdi kópekórineý ózgege jyǵyp bergen qııanatyna shydaı almaı, ádildik izdep kelgenin jasyrmady. Samat Saparbekuly jábirlenýshiniń shaǵymyn muqııat tyńdap alǵannan keıin máseleniń mán-jaıyn egjeı-tegjeıli anyqtaýdy Petropavl qalasynyń ákimi Tólegen Zákirııanovqa tapsyrdy. Qala ákimi ile-shala osy salaǵa jaýapty basshylardy qatystyra otyryp lıft jóndeý jumystarymen aınalysyp júrgen mekeme ókilderimen kezdesý ótkizdi. Onda 15 jyldan beri lıft jóndeýmen shuǵyldanatyn «Petropavl-Lıft» seriktestiginiń bıyl birde-bir tapsyrma almaǵany málim boldy. Kerisinshe, syrttan kılikken «Tehnosıb» JShS «Turǵyn úı-kommýnaldyq sharýashylyǵyn jańǵyrtý» baǵdarlamasy sheńberinde tenderdi utyp ala bergen. Onyń kóldeneń kók attydaı joldan qosylǵan is-áreketiniń arǵy jaǵynda zańnama talaptarynyń óreskel buzylǵanyn ańǵarý qıyn emes edi. Sóıtse, turǵyn úı ınspeksııasynyń ókilderin shaıtan azǵyrǵan bolý kerek, qos taraptyń tenderge qatysý qarymy men múmkindikterin jan-jaqty tarazylap, ádildikpen sheshýdiń ornyna týra joldan taıyp ketken. Tipti, naryq aıdynynda mol tájirıbesi bar mekeme basshylyǵyn jıyndar men basqosýlarǵa shaqyrýdy qajet dep tappaǵanǵa uqsaıdy. Kópqabatty úılerdiń turǵyndaryn ózderi bopsalap otyrǵan mekemeni tańdaýǵa úgittegen kórinedi. Osylaısha, bıýrokrattyq ózimbilemdiliktiń shylbyryna oratylyp, jeke-dara sheshim qabyldaýdyń saldarynan qarsy tarapty jeńimpaz etip shyǵarǵan.
«Turǵyn úı ınspeksııasy» mekemesiniń zańgeri Janar Esetova óz áreketterin aqtamaq bolyp qansha jerden jantalassa da, qyzmetten bosatý uıǵaryldy. Turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń jetekshisi Aleksandr Chernov sógis aldy.
Bul mysal zań talaptaryn belden basýǵa úırengen ózge laýazymdy tulǵalarǵa sabaq bolsa ıgi.
О́mir ESQALI,
«Egemen Qazaqstan».
Soltústik Qazaqstan oblysy.