24 qazanda aralas jekpe-jekten BAÁ astanasy – Ábý-Dabıdegi UFC 254 týrnıri kórermenderdiń qatysýymen ótýi múmkin. Bul jaıynda aıtýly uıymnyń prezıdenti Deına Ýaıt málimdedi. Al sol keshtiń basty básekesinde reseılik Habıb Nýrmagomedov pen amerıkalyq Djastın Getjı kúsh synasady. Olar jeńil salmaqtaǵy chempıondyq ataqty sarapqa salady.
Reseı men Ýkraına aýmaǵynda uıymdastyrylǵan túrli týrnırlerde qarsylas shaq keltirmegen Habıb Nýrmagomedov álemdegi eń beldi promoýshende óziniń tusaýkeser kezdesýin 2012 jyldyń 20 qańtarynda ótkizgen bolatyn. Sol jekpe-jekte ol ırandyq Kamal Shalorýsty qylqyndyryp tastady. Arada alty jyldan asa ýaqyt ótkennen keıin amerıkalyq El Iаkvıntany upaı sanymen utqan Habıb chempıondyq belbeýdi ıelendi. Sodan keıin ırlandııalyq Konor Makgregor men AQSh-tyń ókili Dastın Pýareni aıqyn basymdyqpen jeńip, óz ataǵyn saqtap qaldy. Oktagonda barlyǵy 28 kezdesý ótkizgen 32 jastaǵy Daǵystannyń ulttyq batyry barlyǵynda basymdyq tanytyp, 18 básekeni merziminen buryn aıaqtady.
Djastın Getjı de ońaı qarsylas emes. 14 qarashada 32 jasqa tolǵaly otyrǵan AQSh-tyń Arızona shtatynyń týmasy da túrli dúbirli dodalarda sheberligin shyńdap, 2017 jyldyń jazynda UFC-ge aýysty. Tusaýkeser básekesinde Maıkl Djonsondy uryp jyqty. Sol kezge deıin eshkimnen jeńilmegen saqa sportshy sodan keıin qatarynan eki jekpe-jekte ese jiberdi. Ol óz otandastary Eddı Alvares pen Dastın Pýareden utyldy. Esesine odan keıin Djeıms Vık, Edson Barboza, Donald Serrone jáne Tonı Fergıýssondy soqqyǵa jyqty. Bul básekelerdiń barlyǵy da merziminen buryn aıaqtaldy. Osy kúnge deıin Getjı 24 kezdesý ótkizip, 22 ret jeńis toıyn toılady. 20 qarsylasyn aıqyn basymdyqpen utty. Bul kúnderi amerıkalyq sportshy UFC-diń ýaqytsha chempıony atanyp otyr.
Ábý-Dabıdegi týrnırdi qazaqstandyq jankúıerler de taǵatsyzdana kútýde. О́ıtkeni osy keshte qos birdeı jerlesimiz – Shavkat Rahmonov pen Sergeı Morozov óner kórsetedi. Olardyń ekeýiniń de esimi sportsúıer qaýymǵa jaqsy tanys. 26 jastaǵy Shavkat kúni búginge deıin eshkimnen jeńilgen emes. 12 kezdesýdiń barlyǵyn ol merziminen buryn jáne alǵashqy raýndtarda aıaqtady. Jartylaı orta salmaqtaǵy qandasymyz qazaqstandyq sportshylar arasynan alǵashqy bolyp UFC-men kelisimshartqa otyrdy. Alaıda túrli jaǵdaılarǵa baılanysty Shavkat Rahmonov aıtýly uıym ótkizip otyrǵan jarystarda áli kúsh synasqan joq. Al 31 jastaǵy Sergeı Morozov asa jeńil salmaqta saıysqa túsip, 19 jekpe-jeginiń tek úsheýinde jeńilistiń kermek dámin tatty. Qalǵandaryn óz paıdasyna sheshti. 12 básekede aıqyn basymdyq tanytty. Joǵaryda esimderi atalǵan qos otandasymyz da Reseıde irgetasy qalanǵan M-1 uıymynyń chempıondary.
Parsy shyǵanaǵynda Shavkat Rahmonov 32 jastaǵy Aleks Olıveıramen aıqasady. «Kovboı» degen laqap atpen tanylǵan Brazılııa sportshysy 32 márte aıqas alańyna shyǵyp, 21 ret jeńiske jetti. 18 qarsylasyn esinen tandyrdy. Jeti ret jeńildi. Bir márte teń túsip, taǵy eki kezdesýdiń nátıjesi esepke alynbady. Sergeı Morozov Habıb Nýrmagomedovtiń inisimen kúsh synasýy tıis edi. Alaıda ol aýrýhanaǵa túsip qalǵan soń, oǵan basqa qarsylas izdestirýde.