Shaıbaly hokkeıden Qazaqstan chempıonatynda óner kórsetetin Qaraǵandynyń «Saryarqa» klýbyna jańa bas bapker taǵaıyndaldy.
«Kenshiler» komandasyn buǵan deıin basqarǵan reseılik maman Rýslan Sýleımanov qyzmetinen ketkennen soń, onyń ornyn otandasy Aleksandr Sokolov basty. 1995 jyldan bastap bapkerlik qyzmetin atqaryp kele jatqan 63 jastaǵy maman «Saryarqa» jankúıerlerine jaqsy tanys. О́ıtkeni reseılik bapker 2017/2018 jylǵy maýsymda da Qaraǵandy klýbyn jattyqtyrǵan.
Sokolovtyń bapkerlik qyzmetindegi eń tabysty kezeńi dep 1998/1999 jylǵy hokkeı maýsymyn aıta alamyz. Sol jyly Nıjnekamskiniń «Neftehımık» komandasymen birge Sýperlıga chempıonatynyń (Reseı birinshiligi) pleı-off kezeńine deıin jetken. Keıinnen Joǵary hokkeı lıgasy men Jastar hokkeı lıgalarynda óner kórsetetin Nıjnekamskiniń «Reaktor», Kırovo-Chepesktiń «Olımpııa», Lenınogorskiniń «Neftıanık», Penzanyń «Dızelıa» komandalaryn jattyqtyrǵan. Al «Saryarqaǵa» kelgenge deıin Samaranyń SSK VVS klýbynyń bas bapkeri qyzmetin atqardy.
Aıta keteıik, Joǵary hokkeı lıgasynda baq synaǵan «Saryarqa» klýby pandemııaǵa baılanysty JHL-dan bas tartyp, Qazaqstan chempıonatynda óner kórsetýge sheshim qabyldady.