Almaty oblysynda jalpy pandemııamen kúreske jergilikti bıýdjetten 13 mlrd teńge bólindi, onyń 8,1 mlrd teńgesi ekinshi tolqynǵa daıyndyq úshin bólingen. Oblystyń medısına mekemelerinde jeke qorǵaný quraldarynyń úsh aılyq qory, dárilik zattardyń eki aılyq qory bar, - dep habarlaıdy Almaty oblysy ákiminiń baspasóz qyzmeti.
Oblystyq densaýlyq saqtaý basqarmasynyń málimetinshe, óńirdegi densaýlyq saqtaý mekemelerinde jeke qorǵaný quraldarynyń úsh aılyq qory, atap aıtqanda 6,2 mln betperde, 2,5 mln qolǵap, 74,6 myń bir ret qoldanylatyn qorǵanysh kostıýmderiniń jıyntyǵy bar. Al dárilik zattardyń eki aılyq qory qalyptastyrylǵan, naqtylap aıtsaq, stasıonarlarda 1,4 mlrd teńgege 204 túrli dári, ambýlatorııalarda 101 mln teńgege 5 túrli dári qory bar.
Turaqtandyrý qoryna qosymsha 800 mln teńge bólinip, qarjy kólemi 1,3 mlrd teńgeni qurady. 500 mln teńgege dárilik zattardyń 30 túrin satyp alýǵa "INKAR" JShS biryńǵaı dıstrebıýterimen kelisim shart jasalǵan. Sondaı-aq, "SK Farmasııa" arqyly dárihanalar úshin 33 túrli dárige 63 mln teńgege ótinim berildi, 1 mln betperde satyp alyndy. Bul rette halyqtyń áleýmettik osal toptary da nazardan tys qalǵan joq. Olar úshin jergilikti bıýdjet esebinen 92 mln.teńgege vırýsqa qarsy preparattardyń 4 túri satyp alyndy.
Oblysta jeke qorǵaný quraldary óndirisi jolǵa qoıylǵan. "Dolche", "SP "Abdı Ibrahım Global Farm", "Kelýn-Kazfarm" kompanııalary - osy saladaǵy iri kásiporyndar. Maska tigýge 5 tigin kásiporny beıimdeldi, Taldyqorǵan qalasynda maska tigetin úsh qabatty seh jumys isteıdi. Jalpy táýligine barlyǵy 250 myńnan astam betperde shyǵarylady. Oblys dárihanalarynda satylatyn maskanyń bólshek saýdadaǵy ortasha baǵasy 40 teńgeni qurap otyr.