Saqtansaq, saý bolamyz

Ústimizdegi aıda oblysta koro­na­­vırýsqa shaldyqqan 63 naýqas tir­kelgen. Epıdemıolog mamandar jaman tumaýdyń bas kóterýine tur­ǵyn­dar­dyń burynǵysynsha belsendi ómir daǵdysyna oralýy, sanıtarlyq talaptardy oryndamaýy sebep bolyp otyrǵanyn aıtýda.

– Qazirgi tańda álemniń kóptegen elderinde epıdemııalyq jaǵdaı kúrde­le­ne túsýde. Elimizdiń densaýlyq saqtaý mınıstrliginiń málimetterine sú­ıensek, TMD memleketteriniń jarty­syn­da koronavırýsqa shaldyqqan naý­qas­tar sany Qazaqstanǵa qaraǵanda 11 esege kóp. Oblystaǵy ahýal muqııat baqylanýda. Koronavırýstyń keń taralýynyń aldyn alý úshin tikeleı epıdoshaqtarmen jumys júrgizilýde. Jaman tumaýdan oblysymyzda 77 adam kóz jumdy. Búginde stasıonar­lar­da jáne úı jaǵdaıynda 142 naýqas em qabyldap jatyr. Segiziniń jaǵ­da­ıy aýyr. Biraq, ókpeni jasandy jeldetý apparatyna qosylǵan naý­qas­tar joq. Oblys boıynsha 565 ınfek­sııa­lyq tósektik oryn ázirlendi. Qazir onyń 17 pa­­­ıyzy qoldanysta, deıdi oblys ákiminiń orynbasary Aına Mysyrálimova.

Sybaılas jemqorlyqqa qarsy is-qımyl agenttigi Aqmola oblysy boıynsha departamentiniń basshy­sy Murat Tóleýbaev pandemııa kezeń­in­de dárihanalarǵa monıtorıng júr­gi­zý kezinde dári-dármek baǵasyn ne­gizsiz qymbattatýdyń 32 deregi anyq­talyp, 14 ákimshilik hattama tol­ty­rylǵanyn aıtýda. Oblystyq taýarlar men kórsetiletin qyzmettiń sapasy men qaýipsizdigin baqylaý depar­tamentiniń basshysy Aınagúl Mýsı­na elimizdiń soltústik óńirlerinde epı­demııalyq ahýaldyń kúrdelene tús­ke­nine alańdaýly. 16 qazannan bastap karantın sharalary kúsheıtildi. Bas memlekettik sanıtarlyq dárigerdiń qaýlysyna sáıkes, saýda oryndarynyń jumys ýaqyty shekteldi. Sonymen qa­tar demalys kúnderi qoǵamdyq kólik­ter júrmeıdi.

Kópsalaly oblystyq aýrýhanasy koronavırýs pandemııasy naýryz aıynda elimizdi dendeı bastaǵan tustan-aq atalǵan indetpen kúresti birden bastap, onyń tarap ketpeýi maqsatynda jumys istegen bolatyn. Oblystyń memlekettik bas sanıtarlyq dárigeriniń qaýlysyna sáıkes, teri-venerologııalyq ortalyǵy men Kókshetaý medısınalyq kolledji jataqhanasynyń bazasynda juqpaly-provızorlyq, karantındik stasıonarlar uıymdastyryldy. Naýryz-mamyr aılarynda munda 355 tósektik oryn ashylyp, onyń 255-i karantındik, 100-i provızorlyq bólimshelerde boldy. Juqpaly bólimshede indet juqtyrǵandyǵy laboratorııalyq jolmen, PTR testimen anyqtalǵan naýqastar emdelse, provızorlyq orta­lyq­ta indet belgileri bar adamdar boldy, karantındik bólimshede naýqas­tar­­men qarym-qatynasta bol­ǵan­dar jat­qyzyldy.

Juqpaly-provızorlyq, karan­tındik stasıonarlar barlyq sa­nıtar­lyq-epıdemııalyq nor­ma­lar­ǵa sáıkes, qala ishinde bolsa da, mańaıyn­da­ǵy eshbir mekememen shektesip, qosylmaıdy. Arnaıy bólek kiretin beketteri, jeldetkish júıeleri bar. Bir ereksheligi, mekemeniń ár qabaty ortalyqtandyrylǵan ottegimen qam­tý júıesimen jabdyqtalǵan. Reanı­ma­sııalyq blok 11 jasandy jeldetý apparattarymen jabdyqtalyp, stasıonar ottegi konsentrattarymen, jyljymaly rentgen apparaty­men jaraqtandyrylǵan. Taıaýda qýattylyǵy mınýtyna 300 lıtrdi quraıtyn ottegi konsentratyn satyp alýǵa oblystyq bıýdjetten qarjy bólindi.

– Qazirgi ýaqytta joǵaryda atalǵan eki mekemeni ortalyqtandyrylǵan ottegimen qamtý sharalary qolǵa aly­nyp jatyr. Qarasha aıynyń sońyna qaraı teri-venerologııalyq orta­lyq pen medısınalyq kolledj jataq­hanasy ortalyqtandyrylǵan ottegi júıesimen tolyq qamtylady. Arna­ıy stansa quryldy. Jalpy, osy orta­lyqtandyrylǵan ottegi júıe­si­men qamtý úshin bıýdjetten shamamen 100 mln teńgege jýyq qarjy qarastyryldy, – deıdi kópsalaly oblystyq aýrýhananyń bas dárigeri Nurlan Jarov.

Kópsalaly oblystyq aýrýhanada indet dendegen kezde onymen kúresýge 198 qyzmetker jumyldyryldy. Olardyń 38-i dáriger, 86-sy orta medı­sınalyq qyzmetker, 74-i kishi medısınalyq personal. Jalpy, 5 naýryz ben 15 qyrkúıekke deıingi aralyqta juqpaly-provızorlyq, karantındik stasıonarlarda bas-aıaǵy 2 040 naýqas emdelip shyqqan. Sonyń ishinde 257-i juqpaly, 934-i provızorlyq, 849-y karantındik bólimshelerde emdelgen.

Indet anyqtalǵan naýqastardy jáne olarmen qarym-qatynas jasaǵan adamdardy stasıonarlarǵa jatqyzý úshin arnaıy qural-jabdyqtary men oqshaýlaý kabınalary bar kólikter paıdalanylypty. Qazirgi ýaqytta stasıonarlar dári-dármek, ottegi konsentrattary, zararsyzdandyrý sekildi qorǵanys quraldarymen tolyq qamtylyp, birne­she aıǵa jetetin qor jınap aldy. Pan­de­­mııanyń ekinshi tolqynyna da­ıyn ekendikterin jetkizgen bas dáriger áli de bolsa, daıyndyq jumystary kún sa­ıyn júrgizilip jatqanyn aıtyp otyr.

– Ázirge ýaqytsha jabyq turǵan bul stasıonarlar qajet bola qalǵan kezde mindetti túrde qaıta ashylyp, naýqastardy qabyldaıtyn bolady. Dárigerler tapshylyǵy qashan da ózekti másele, ony vedomstvolyq basqarma shama-sharqy jetkenshe sheship jatyr. Bıyl joǵary oqý oryndaryn támamdaǵan birshama jas mamandar qatarymyzǵa qosyldy. Osylaısha maman tapshylyǵyn azaıtyp jatyrmyz. Kóp qyzmetshilerdiń tájirıbeleri qalyptasyp qaldy. Epıdemııamen kú­res­ke ázirmiz, – deıdi Nurlan Qaıyruly.

Saqtyq artyq etpeıdi. Oblysta atqarylyp jatqan daıyndyq ju­mys­ta­ry alǵashqy kezeńdegi olqylyqtardyń ornyn toltyryp, qapysyz qamdanýdyń qajet­tiliginen týyndaǵan dúnıe. Den­saýlyq saqtaý salasynyń basshylary jaýap­kershilikti jete túsinip, jiti qımyl­dap otyrǵandyǵy kóńilge medeý.

Aqmola oblysy