Densaýlyq saqtaý mınıstri Alekseı Soı Almaty qalasyndaǵy A.N.Syzǵanov atyndaǵy Ulttyq ǵylymı hırýrgııa ortalyǵynyń jumysymen tanysty. Vedomstvo basshysy ortalyqtaǵy klınıkalyq-dıagnostıkalyq zerthanada, rentgen-hırýrgııa, ıntervensııalyq kardıologııa jáne arıtmologııa bólimshesinde, sondaı-aq gepatopankreatobılıarlyq hırýrgııa jáne baýyr transplantasııasy bólimshesin aralady.
Atalǵan ortalyq Densaýlyq saqtaý mınıstrliginiń qoldaýymen otandyq hırýrgııanyń kóshbasshysy sanalady. Mundaǵy mamandar halyqqa joǵary tehnologııalyq medısınalyq qyzmet kórsetý boıynsha úzdik uıymdastyrýshylyq-ádistemelik tájirıbe jınaqtaǵan. A.N.Syzǵanov atyndaǵy ulttyq ǵylymı hırýrgııa ortalyǵy elimizdegi kópbeıindi medısınalyq klınıkalary arasynda jetekshi oryn alady. Munda hırýrgııalyq emniń barlyq túri bar, sondaı-aq transplantologııalyq kómek kórsetiledi.
Sapar qorytyndysy boıynsha A.Soı ortalyq jumysynyń sapasyn joǵary baǵalap, ujymǵa tabys tiledi. Sonymen qatar Densaýlyq saqtaý mınıstri Qazaq onkologııa jáne radıologııa ǵylymı-zertteý ınstıtýtyna da bardy. Mınıstr 18 jasqa deıingi balalar bólimshesiniń jumysymen tanysty. Memleket-jekemenshik áriptestik aıasynda ashylǵan zamanaýı PET/KT ortalyǵyn aralap kórdi. Qazaq onkologııa jáne radıologııa ǴZI onkologııalyq aýrýlardyń aldyn alýǵa, erte dıagnostıkalaýǵa, tıimdi emdeýge jáne ońaltýǵa baǵyttalǵan memlekettik saıasatty iske asyrady. Instıtýt klınıkasynda jyl saıyn 8 500-den astam pasıent emdeledi, jylyna 1500-den astam hırýrgııalyq operasııa jasalady.
Instıtýtta respýblıka boıynsha qaterli isiktiń belgili bir túrin emdeıtin biregeı bólimsheler jumys isteıdi. Qazaq onkologııa jáne radıologııa ǴZI qaterli isikterdi dárimen emdeýdiń zamanaýı qaǵıdalary, sonyń ishinde targettik terapııa, joǵary dozaly hımıoterapııa jáne ımýýnoterapııa keńinen qoldanylady. Klınıka isikti tolyqqandy, jan-jaqty dıagnostıkalaý men emdeý úshin zamanaýı jabdyqtarymen jabdyqtalǵan. Instıtýt zerthanasynda jalpy klınıkalyq zertteýden bastap molekýlalyq-genetıkalyq zertteýlerge deıin jasalady.