Juqpaly indetpen kúresý sharasy Jetisý ólkesinde de kún tártibinen túsken joq. Pandemııanyń ekinshi tolqynyna daıyndyq joǵarǵy deńgeıde júrip jatyr. Qazir oblystyń bas sanıtar dárigeriniń sheshimimen óńirde birqatar shekteýler qoıyldy.
Máselen, Taldyqorǵan qalasynda qoǵamdyq kólik qatynasy arnaıy keste boıynsha júre bastady. Sondaı-aq adam kóp shoǵyrlanatyn saýda-sattyq, mádenı mekemeler men sport nysandarynyń qyzmetine de shekteýler engizildi. Mekemelerdegi qyzmetkerler sanyn meılinshe azaıtý maqsatynda qashyqtan jumys isteý rejimi qaıta qoldanylýda.
Jalpy, Almaty oblysynda jeke qorǵaný quraldarynyń 3 aılyq qory, dárilik zattardyń 2 aılyq qory bar eken. Al pandemııamen kúreske jergilikti bıýdjetten 13 mlrd teńge qarastyrylǵan bolsa, onyń 8,1 mlrd teńgesi ekinshi tolqynǵa daıyndyq úshin bólingen.
– Oblystyń densaýlyq saqtaý mekemelerinde jeke qorǵaný quraldarynyń 3 aılyq qory, atap aıtqanda 6,2 mln betperde, 2,5 mln dana qolǵap, 74,6 myń bir ret qoldanylatyn qorǵanysh kostıýmderiniń jıyntyǵy bar. Al dárilik zattardyń 2 aılyq qory qalyptastyrylǵan, naqtylap aıtsaq, stasıonarlarda 1,4 mlrd teńgege 204 túrli dári, ambýlatorııalarda 101 mln teńgege 5 túrli dári qory bar, – deıdi oblys ákiminiń orynbasary Batyrjan Baıjumanov.
Sondaı-aq turaqtandyrý qoryna qosymsha 800 mln teńge bólinip, jalpy qarjy kólemi 1,3 mlrd teńgeni qurady. Onyń ishinde 500 mln teńgege dárilik zattardyń 30 túrin satyp alýǵa «INKAR» JShS biryńǵaı dıstrıbıýterimen kelisimshart jasalǵan. Munan bólek, «SQ Farmasııa» arqyly dárihanalar úshin 33 túrli dárige 63 mln teńgelik ótinim berilgen, qosymsha 1 mln dana betperde satyp alyndy. Osy rette halyqtyń áleýmettik osal toptary da nazardan tys qalmaıdy. Muqtaj adamdar úshin jergilikti bıýdjet esebinen 92 mln teńgege vırýsqa qarsy preparattardyń 4 túri satyp alynǵan eken.
Aıtpaqshy, Almaty oblysy jeke qorǵaný quraldary óndirisin jolǵa qoıǵan biregeı óńir. Aımaqtaǵy «Dolche», «SP «Abdı Ibrahım Global Farm», «Kelýn-Kazfarm» kompanııalary otandyq naryqqa dári-dármek qana emes, medısınalyq preparattar da shyǵaryp jatyr. Jyl basynan beri medısınalyq maska tigýge 5 tigin kásiporny beıimdeldi. Bir ǵana Taldyqorǵan qalasynda maska tigetin úsh qabatty seh jumys isteıdi.
Jalpy, óńirdegi óndirister táýligine barlyǵy 250 myń danadan astam betperde shyǵarady. Al oblys dárihanalarynda satylatyn maskanyń bólshek saýdadaǵy ortasha baǵasy 40 teńge shamasynda.
Almaty oblysy