Túrkistan oblysynyń dárigerleri júkti áıelderdiń bosaný nemese odan keıingi kezeńde qan ketýin ýaqytsha toqtatýdyń jańa ádisin oılap tapty, dep habarlaıdy Egemen.kz.
Otanyń biregeı ádisin engizgen úzdikter Ulttyq zııatkerlik menshik ınstıtýtynyń patentine ıe boldy. Operasııanyń bul túrin 1,5 jyl boıy zerttegen topqa Túrkistan qalasyndaǵy №3-shi perınataldy ortalyǵynyń bas dárigeri, onko-gınekolog Nurjan Mahmýdov basshylyq etken.
Medısına salasynda 33 jyl qyzmet atqaryp júrgen bilikti dárigerdiń aıtýynsha, otanyń jańa tásili dúnıejúzi boıynsha alǵash ret qoldanysqa engizilýde. "Júkti áıelder arasynda sábıdiń plasentadan ajyraýy - jıi kezdesetin asqynýlar. Kóp mólsherde qan joǵaltý - ana men bala ómirine de asa qaýipti jaǵdaı. Jańadan oılap tapqan ádisimiz boıynsha sıstema arqyly jatyrdaǵy qan tamyrlaryn baılap qan ketýdi ýaqytsha toqtatamyz. Bul emdik sharany ári qaraı josparlaýǵa, jedel kómek kelgenshe nemese shalǵaı aýdandarǵa bilikti hırýrg-dáriger jetkenge deıin qandy joǵaltpaýǵa múmkindik beredi", deıdi Nurjan Talǵatbekuly.
Arnaıy sarapshy-mamandardyń taldaýynan ótken bul ádisti aldaǵy ýaqytta óńirdegi áriptesterine egjeı-tegjeıli túsindirý maqsatynda arnaıy semınarlar uıymdastyrylmaq. Sonymen qatar, dárigerler jatyrǵa endoskopııalyq ádispen ota jasaýdyń da jańa tásilin zerttep, halyqaralyq patentke usynýdy josparlaýda. Aıta ketelik, Túrkistan oblystyq №3-shi perınataldy ortalyqtyń dárigerleri bul ádis boıynsha 10 ret ota jasaǵan. Barlyǵy da sátti ótken.
Túrkistan oblysy