Jezqazǵanda jol qozǵalysy erejesin buzǵan júrgizýshiniń kóliginen qatyrylǵan kıik eti tabyldy, – dep habarlaıdy Polisia.kz.
21 qazan kúni Jezqazǵan qalalyq Polısııa basqarmasynyń qyzmetkerleri “Brakoner” jedel – aldyn alý is-sharasy barysynda jol júrý erejesin buzǵan 50 jastaǵy azamattyń basqarýyndaǵy avtokólikti toqtatqan. Oǵan qatysty Qazaqstan Respýblıkasy Ákimshilik quqyq buzýshylyq týraly kodeksiniń 601-babyna (Jol belgilerimen nemese joldyń júrý bóligindegi tańbalarmen kórsetilgen talaptardy saqtamaý) sáıkes hattama toltyrylǵan. Kólikke júrgizilgen tekserý barysynda avtomashınanyń júk salǵyshynan qatyrylǵan kıik eti tabyldy.
Atalǵan fakt boıynsha Qazaqstan Respýblıkasy Qylmystyq kodeksiniń 339-babyna (О́simdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes qylmystyq is qozǵaldy. Tıisti saraptamalar taǵaıyndalyp, tergeý amaldary júrgizilýde.