Aqsaı qalasynda Abaı Qunanbaıuly, Baýyrjan Momyshuly, Batyrhan Shókenov syndy belgili tulǵalardyń sýreti kópqabatty turǵyn úılerdiń qabyrǵasyna salynǵanyn budan buryn jazǵan edik. Endi Batys Qazaqstan oblysynyń ózge aýdan ortalyqtarynda da osyndaı mýraldar paıda bola bastady, dep habarlaıdy Egemen.kz.
Jaqynda Bókeı ordasy aýdanynyń ortalyǵy Saıqyn aýylynda qos qabatty úıdiń qabyrǵasyna Jáńgir hannyń beınesi salyndy. Mýraldy oraldyq sýretshiler Iаkov pen Darıa Polıshýk salyp shyqqan.
Aıta keteıik, 2021 jyly Bókeı handyǵynyń qurylǵanyna 220 jyl tolmaq. 1801 jyly Nuraly hannyń balasy Bókeı sultan qolastyndaǵy halqymen birge Edil-Jaıyq ózenderiniń arasyndaǵy baıtaq dalaǵa ótip, Ishki qazaq ordasynyń, ıaǵnı Bókeı handyǵynyń negizin qalaǵan bolatyn.
Osy kúnderi Aqjaıyq aýdanynyń ortalyǵy Chapaev selosynda da uly Abaıdyń beınesi salynyp jatyr. Ihsanov kóshesinde ornalasqan 2 qabatty úıdiń qabyrǵasyna beıneletin bul mýral uly aqynnyń 175 jyldyq mereıtoıyna arnalǵan.
Batys Qazaqstan oblysy