Qorǵanys mınıstrliginiń bastamasy boıynsha Sybaılas jemqorlyqqa qarsy is-qımyl agenttiginiń basshylyǵymen kezdesý ótti, dep habarlaıdy Egemen.kz agenttiktiń baspasóz qyzmetine silteme jasap.
Negizgi kún tártibi qarýly kúshter qatarynda jemqorlyqtyń aldyn alý baǵyty boıynsha ózara is-qımyl máselelerine baǵyttalǵan.
Is-sharaǵa Sybaılas jemqorlyqqa qarsy qyzmet janyndaǵy qoǵamdyq konsýltatıvtik-keńesshi organdardyń ókilderimen qatar ásker túrleriniń bas qolbasshylary, óńirlik qolbasshylyqtardyń, ásker tekteriniń qolbasshylary, jergilikti áskerı basqarý organdarynyń jáne áskerı polısııanyń bastyqtary qatysty.
Kezdesýge qatysýshylarǵa arnaǵan sózinde Qorǵanys mınıstri Nurlan Ermekbaev jasalǵan memorandým aıasyndaǵy kásibı qoldaý, tájirıbelik kómek jáne yntymaqtastyq úshin Agenttikke alǵysyn bildirdi.
Alık Shpekbaev jemqorlyqqa qarsy bastamalardyń iske asyrylý barysyn jarııa ete otyryp, jeke jaýapkershilik týraly normalar aıasynda sybaılas jemqorlyq quqyq buzýshylyqtardyń aldyn alýyn álsiretetin basshylarǵa qatysty qaǵıdattyq sheshimder qabyldaýdyń, jemqorlyq táýekelderine ishki taldaýlardy sapaly oryndaýdyń jáne memlekettik organnyń mánmátini eskerilgen ózindik bastamalardy pysyqtaýdyń mańyzdylyǵyn atap ótti.
"Armııa parasattylyqtyń, tártip pen tazalyqtyń tiregi bolýy kerek. Ortalyq deńgeıde osy baǵytta qoldaýǵa laıyq mańyzdy qadamdar qabyldanýda. Áskerı bólimderde aldyn alý sharalaryn kúsheıtý talap etiledi. Sonymen qatar, ozyq tehnologııalardy engize otyra, áskerı bólim qoǵam aldynda armııanyń tiregine aınalatyn azamattarmen ózara árekettesýdiń úlgili "terezesine" aınalýy kerek. Bul turǵyda turmystyq jemqorlyqtyń aldyn alý maqsatynda memlekettik qyzmetterdi avtomattandyrý jáne sıfrlandyrý máselelerine erekshe nazar aýdarý qajet", dep atap ótti Agenttik tóraǵasy.
Spıkerler elimizdiń qorǵanys qabiletin qamtamasyz etý jáne memleketti syrtqy qaterlerden qorǵaýdyń strategııalyq mindetterin eskere otyryp, jemqorlyqtyń aldyn alý jalpy Qorǵanys mınıstrligi men qarýly kúshter qyzmetinde mańyzdy ról atqaratynyn atap ótti.
Qorǵanys mınıstri Nurlan Ermekbaev vedomstvoda sybaılas jemqorlyqqa qarsy is-qımyl boıynsha ishki qaýipsizdik fýnksııalarymen basqarma qurý týraly aıtyp berdi. Ol áskerı qyzmetke kelisimshart boıynsha memlekettik, áskerı qyzmetten, arnaıy jáne quqyq qorǵaý organdarynan teris sebeptermen bosatylǵan tulǵalar qabyldanbaıtynyn atap ótti.
Mınıstrliktiń sybaılas jemqorlyqqa qarsy is-qımyl komıssııasynyń jumysy – normatıvtik quqyqtyq qordy taldaýda jáne táýekeldiń "aımaqtaryn" anyqtaýda bastapqy núkte. Áskerı qyzmetke shaqyrý, memlekettik satyp alýdy iske asyrý, jeke quramdy tamaqtandyrý jumysyn uıymdastyrýdy baqylaý, kúrdeli qurylys, turǵyn úıdi bólý salalarynda jáne basqa da máseleler boıynsha 90-ǵa jýyq usynymdar ázirlendi.
Atap aıtqanda, áskerge shaqyrýdy keıinge qaldyrýdy usyný jáne odan bosatý boıynsha eki memlekettik qyzmet Elektrondyq úkimet portaly arqyly ashyq kórsetiletin bolady.
"Qorǵanys mınıstrligi azamattardyń aıryqsha senimine ıe. Qoǵammen keri baılanys deńgeıin odan ári arttyrý maqsatynda "Qarýly Kúshter – Adaldyq alańy" jobasy aıasynda jergilikti áskerı basqarý organdarynyń memlekettik qyzmetter kórsetýiniń servıstik modelin qamtamasyz etý qajet", dep atap ótti Arnaıy monıtorıngtik toptyń jetekshisi Aıgúl Soloveva.
Kezdesý qorytyndysy boıynsha taraptar birlesken kúsh-jigerdi eskere otyryp, qorǵanys vedomstvosyndaǵy jemqorlyq deńgeıiniń jalpy tómendeý trendin atap ótti. Áriptestikti nyǵaıtý aıasynda aǵymdaǵy jyldyń qarasha aıynda jergilikti áskerı basqarý organdarynda jemqorlyq táýekelderine syrtqy taldaý júrgizý týraly birlesken buıryqqa qol qoıyldy.