Túrkistan qalasynda shyǵystyń Arıstoteli atanǵan Ábý Nasyr Ál-Farabıdiń eńseli eskertkishi ashyldy. Saltanatty rásimge Memlekettik hatshy Qyrymbek Kósherbaev, Úkimet basshysynyń orynbasary Eraly Toǵjanov, Túrkistan oblysynyń ákimi О́mirzaq Shókeev qatysty, dep habarlaıdy Egemen.kz
Eńseli eskertkish jańadan boı kótergen «Oblystyq drama teatry» mekemesiniń aldyna ornatylǵan. Uly oıshyl, ǵulamanyń beınesi jan-jaqty daralyqta jetkizilgen. Qoladan quıylǵan eskertkishtiń bıiktigi 4 metr, 3,5 metrlik tuǵyrǵa ornatylǵan, jalpy bıiktigi 7,5 metrdi quraıdy. Saltanatty rásimde Memlekettik hatshy Qyrymbek Kósherbaev Memleket basshysy Qasym-Jomart Toqaevtyń bastaýymen IýNESKO-nyń qoldaýymen Ábý Nasyr Ál-Farabıdiń 1150 jyldyǵy atap ótilip jatqanyn aıtty.
"Halqymyzdyń ustazy, hakim Abaıdyń 175 jyldyq mereıtoıy qoǵamda úlken rýhanı izdenisterge, jańalyqtarǵa arqaý boldy. Sondyqtan Elbasynyń, Prezıdentiń uıǵarymdaryna sáıkes, osy eki rýhanı tulǵaǵa arnalǵan eskertkishterdiń rýhanı astanamyz Túrkistanda turýy árıne zańdylyq, árıne qajettilik. О́ıtkeni bul eskertkishter jańa táýelsizdik zamanynda bizdiń rýhanı jańǵyrýymyzǵa qoldaýshy ári kýáger bolady degen úmitten shyqqan nıet, shara", dedi Memlekettik hatshy.
Sondaı-aq kópshilik aldynda sóz alǵan jazýshy Marhabat Baıǵut qos ǵulamanyń el rýhanııaty men ǵylymyna sińirgen eńbegi men eskertkish ornatýdyń mán-mańyzyna toqtaldy.
Aıta ketelik, Memlekettik hatshy Qyrymbek Kósherbaev bastaǵan arnaıy delegasııa sondaı-aq, Túrkistan qalasyndaǵy «Vızıt» ortalyǵy men Otyrar aýdanyndaǵy qaıta jóndeýden ótken Ál-Farabı estertkishi men "Dańqty babalar saıajoly" alleıasynda boldy.
Túrkstan oblysy