Almatynyń tótenshe jaǵdaılar qyzmeti jeksenbiniń tańyn taǵy da «baraholkadan» túsken dabylmen qarsy aldy. Jýyrda ǵana 3 bazar órtenip, shyqqan shyǵynnyń ushtyǵyna jete almaı otyrǵanda, qala ústine qara tútin taǵy da qaptady.
Almatynyń tótenshe jaǵdaılar qyzmeti jeksenbiniń tańyn taǵy da «baraholkadan» túsken dabylmen qarsy aldy. Jýyrda ǵana 3 bazar órtenip, shyqqan shyǵynnyń ushtyǵyna jete almaı otyrǵanda, qala ústine qara tútin taǵy da qaptady.
«Baraholkadaǵy» kezekti órt týraly habar qalalyq ishki ister basqarmasy qyzmetine tańǵy saǵat 6-dan 15 mınýt ótkende túsken eken. Bul joly «Qulager» bazaryndaǵy saýda konteınerleri men qoımalar qyzyl jalynǵa oranǵan.
Resmı aqparat boıynsha bul jerdiń 3000 sharshy metr aýmaǵy kúlge aınalyp, alapat órtti sóndirýge 41 arnaıy tehnıkalyq qural men jeke quramnyń 245 múshesi qatysqan. Sonymen qatar, «Qazavıakómek» JShS KA-32 markaly tikushaǵy arqyly 33 tonna sý órt oshaǵyna áýeden jaýdyrylǵan. Qala basshysy Ahmetjan Esimov tez arada órtten japa shekken saýdagerlerdiń naqty tizimin jasaýdy aýdan basshylaryna jáne órttiń shyǵýyn anyqtaýdy órtke qarsy qyzmetke arnaıy tapsyrdy.
Sonymen, talaı tehnıka men arnaıy mamandar jumyldyrylǵan alapat órt jeksenbi kúni túske salym aýyzdyqtalǵan syńaıly. Keı derekterde 15 saǵat boıy bas bermedi delingen. Jaraıdy, bizdiń aıtpaǵymyz ol emes edi.
Nege sońǵy kezderi «baraholkaǵa» órt úıir bolyp ketti? Jýyrda ǵana bolǵan alapat jalyndy dánekerleý jumystarynan kórip edik, endi myna órtke bazar kúzetshileri kinálanyp otyrǵan sekildi. Alyp-qashty áńgime jeterlik. Desek te, buqaranyń nápaqa taýyp otyrǵan «kózine» aınalǵan jerde jergilikti basqarý qyzmeti men bazar qojaıyndary áli kúnge «qyzyl syzyqqa» talasyp júrgen jaıy bar.
Qalaı bolǵanda da bazar órtendi. Biraz jurt qyp-qyzyl shyǵynǵa batty. Munyń daýy birazǵa sozylyp, maly aman, qorasy bútin aǵaıynnyń uıqysyn buzary haq.
Sonda da, ár kókeıde bir suraq júre bermek...
«Baraholkanyń» órtenýi nege basylmaı tur?!
Qanat ESKENDIR,
«Egemen Qazaqstan».
ALMATY.