Soltústik Qazaqstan oblysyna Sybaılas jemqorlyqqa qarsy is-qımyl agenttiginiń tóraǵasy Alık Shpekbaev jumys saparymen keldi, dep habarlaıdy Egemen.kz.
Vedomstvo basshysy óńirge sapar barysynda eń aldymen Keller aýlyna at basyn tirep, «Ashyq ákimdik» front-keńsesiniń ashylýyna qatysty.
Budan bylaı Keller aýyldyq okrýginiń turǵyndary ákim apparatynyń mamandary men veterınarlyq dárigerdiń kómegine front-keńsede júgine alatyn boldy. Oǵan qosa ortalyq ótinishterdi qabyldaý sektory, ózine-ózi qyzmet kórsetý orny jáne áleýmettik rolıkterdi taratatyn ekranmen jabdyqtalǵan.
«Men aýyl halqyna memlekettik qyzmetterdi barynsha qoljetimdi etý úshin jaqsy jaǵdaı jasalǵan dep esepteımin. Bastalǵan jumystyń sońy bar. Endi turǵyndardy sıfrlyq saýattylyqqa úıretý kerek. HQKO tájirıbesine saı, tólemder úshin bankomattar men termınaldar ornatý qajet», - dedi Alık Shpekbaev.
Agenttik Tóraǵasy memlekettik qyzmet kórsetýlerdi avtomattandyrýdyń mańyzdylyǵyna nazar aýdardy. Antıkor jetekshisi Prezıdenttiń tapsyrmasy men halyqaralyq standarttarǵa saı bolý úshin memlekettik qyzmet kórsetýlerdi 100% elektrondy nusqaǵa aýdarý qajettigin erekshe atap ótti. Elektrondy úkimettiń damýy boıynsha búgingi tańda Qazaqstan BUU elderi arasynda 194 memlekettiń ishinde 28 orynda tur. Bul respýblıkada sıfrovızasııanyń damý qarqynynyń jyldamdyǵyn dáleldeıdi.
«Ashyq ákimdik» qoǵamdyq qabyldaý túrinde de qyzmetin atqaratyn bolady. Endi aýyldyq okrýg ákimi birinshi qabatta «open space» kabınette ornalasady. Jeke qabyldaýǵa nıet bildirýshilerge bul óte qolaıly.
«Bizdiń maqsatymyz – túrli qyzmetter men keńesterdi bir orynda kórsetý arqyly adamdardyń ýaqytyn únemdeý. Buǵan deıin, máseleni sheshý úshin shartty túrde 10-15 kún qajet bolsa, búginde nebári 2-3 kún ǵana ketedi», - dedi oblys ákimi Qumar Aqsaqalov.
Ortalyqtyń ashylǵanyna aýyl turǵyndary dán rıza. Qýanyshtaryn jasyrmaǵan aqsaqaldar endi kómekke júginý úshin aýdan ortalyǵyna at terletýdiń qajeti joq deıdi. Aıta ketý kerek, Keller aýly buryn aýdan ortalyǵy bolǵan.
Aıta ketý kerek, Agenttik Tóraǵasynyń baǵdarlamasynda Petropavl qalasyndaǵy «AGROKÓMEK» servıstik ortalyǵynyń ashylýy da bar.