Elordada serýendeýge jáne jaıly demalysqa arnalǵan jańa qoǵamdyq oryn paıda boldy. Almaty aýdany Promyshlennyı eldi-mekeninde sport alańymen, múmkindigi shekteýli balalardyń da qajettilikteri úshin jabdyqtalǵan oıyn alańy ashyldy, dep habarlaıdy Egemen.kz.
«Munda jaryqtandyrý, sýarý júıesi tolyǵymen avtomattandyrylǵan. Sonymen qatar, turǵyndar zaman talabyna saı, zamanaýı, jattyǵý qurylǵylary ornatylǵan sport alańy salyndy. Buǵan qosa balalarǵa arnalǵan oıyn alańy da ornatyldy», — deıdi Nur-Sultan qalasy Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Aıdyn Begimbekov.
Onyń aıtýynsha, saıabaqta múmkindigi shekteýli balalardyń da jaǵdaıy nazardan tys qalmaǵanyn aıryqsha atap ótti.
Park ishinde shaǵyn aýdannyń turǵyndarymen qosylyp, senbilik tǵ uıymdastyrylǵan. Sonyń nátıjesinde 40 qaraǵaı aǵashy egildi.
Basqarma basshysy atap ótkendeı, «Nur-Sultan — jaıly qala» jospary boıynsha elordanyń shet aýmaǵyndaǵy bos jatqan jerlerdi ıgerý arqyly, sol sııaqty jaramsyz eski ǵımarattardy buzý arqyly el ıgiligine, turǵyndardyń jaılylyǵyna arnalǵan alańqaılar, saıabaqtar birtindep ashylatyn bolady.
Aıta ketý kerek, elorda turǵyndary men qonaqtaryna yńǵaıly bolý úshin aýla aýmaqtaryn abattandyrýǵa kóp kóńil bólinedi. Bıylǵy jyldyń ózinde qalada 150 aýla men 50-den astam qoǵamdyq keńistik abattandyryldy.