Oblys ortalyǵyndaǵy "Ertis daryny" óńirlik qosymsha bilim berý oqý-ádistemelik ortalyǵynyń málimetinshe, oqýshylardyń ekologııalyq bilimin jaqsartý maqsatynda ortalyqta qashyqtan 1-6 synyp oqýshylary arasynda sýretter men qolóner buıymdarynyń konkýrsy ótti, dep habarlaıdy Egemen.kz.
Úzdik sýret baǵytyna 1-4 synyp oqýshylary qatysty. Árbir qatysýshy 5 sýretten turatyn ekologııalyq taqyrypqa, peızajdar men tabıǵatqa, týǵan ólkeniń qorshaǵan ortasyn saqtaýǵa jáne uqypty qaraýǵa arnalǵan jumystar toptamasyn usyndy.
Al, úzdik kórkem qolóner baıqaýy 5-6 synyp oqýshylary arasynda uıymdastyryldy.
Balalardyń shyǵarmashylyq jumystary ıdeıalardyń asa ereksheligi, shyǵarmashylyq kózqaras, oryndaý tehnıkasynyń deńgeıi, jumysty bezendirýdiń estetıkasy, oryndalǵan jumystarynyń sapasy boıynsha oryndar anyqtaldy.
Ortalyq qyzmetkeri Aısulý Bákibaevanyń aıtýynsha, baıqaýdyń oblystyq kezeńine aýdandyq jáne qalalyq kezeńderdiń 104 júldegeri qatysqan.
Konkýrs júldegerleri atanǵan 59 oqýshy oblystyq bilim basqarmasynyń I, II, III dárejeli dıplomdarymen marapattaldy.
Onyń ishinde qala jáne aýyl mektepterinen I dárejeli dıplomǵa – 14 oqýshy, II dárejeli dıplomǵa – 19 oqýshy, III dárejeli dıplomǵa – 26 oqýshy ıe boldy.
Barlyq oqýshylarǵa konkýrsqa qatysýshynyń sertıfıkattary tabys etiledi.
Al, baıqaýdyń úzdik jumystary "DARYN ECOART" sýretter men qoldan jasalǵan buıymdardyń respýblıkalyq ekologııalyq konkýrsyna jiberiledi.
Pavlodar oblysy