Nıgerııada birneshe kúnnen beri halyqtyń narazylyǵy basylmaı tur. Eldegi arnaıy quqyq qorǵaý organdarynyń aıaýsyz áreketterine qarsy halyq alǵashynda áleýmettik jelide narazylyq tanyta bastady. Bul narazylyqtyń sońy Nıgerııa kóshelerindegi sherýge ulasty. Urlyqqa qarsy arnaıy bólim (SARS) dep atalatyn daýly polısııa bólimshesiniń urlaý, qýdalaý jáne bopsalaý sekildi áreketteri qarapaıym turǵyndardyń zyǵyryn shyǵarǵan. Narazylyq seısenbide eldiń eń úlken qalasy Lagosta qandy oqıǵalarǵa alyp kelgen. Sebebi shtat boıynsha komendanttyq saǵat ornaǵanyna qaramastan sherý toqtamaǵan. Kýágerler birneshe adamdy áskerıler atyp óltirgenin, al denelerin alyp ketkenin aıtqan.
Oqıǵaǵa baılanysty málimdeme jasaǵan el prezıdenti Mýhammadý Býharı qalada haos ornaǵanyn aıtyp, kópshilikti túsinistik pen tynyshtyqqa shaqyrǵan. Alaıda kelesi kúni ashynǵan belsendiler ǵımarattardy órtep, polısııa beketterine shabýyl jasaǵan. Nıgerııa prezıdenti birneshe kúnge jalǵasqan bassyzdyq saldarynan 69 adamnyń qaza tapqanyn aıtty. Qaza bolǵandardyń kóbi beıbit turǵyndar, arasynda quqyq qorǵaý organdarynyń ókilderi de bar. Endi bılik eldegi tártipti qalpyna keltirýdiń jolyn izdep álek. Polısııaǵa qarsy sherýlerdiń sońy jyldar boıy el bıligine jınalǵan narazylyqtyń da bir kórinisine ulasty deıdi sarapshylar.
Nıgerııa – Afrıka qurlyǵynda eń kóp, 200 mıllıon halqy bar memleket, olardyń 60%-dan astamy 24 jasqa tolmaǵan. Eńbekke qabiletti jastaǵy adamdardyń kópshiliginde jumys joq jáne jaqsy bilim alýǵa múmkindikteri az. Osy jyldyń basynda úkimettiń statıstıkasy nıgerııalyqtardyń 40%-y kedeılikte ómir súretinin kórsetken.