Qytaılyq Huawei AQSh sanksııalaryna qaramastan, óndiristi jalǵastyrý úshin qoldan kelgenniń bárin jasap jatqanyn aıtqan.
Bul kompanııa – Donald Tramptyń ulttyq qaýipsizdikke qatysty kúdigine ilikken Qytaı bıznesteriniń biri. Telefon óndirýshisi qyrkúıek aıynda AQSh-tyń saýda-sattyq týraly tyıymy kúshine engenge deıin mıkrochıpterdiń qoryn jınaýmen aınalysqan. Sebebi tehkompanııa óz smartfondaryna AQSh tehnologııasymen jasalǵan chıpterdi qoldanady. Endi aldaǵy ýaqytta sanksııanyń kesiri telefon óndirisine aıtarlyqtaı kedergi bolaıyn dep tur. Odan bólek pandemııa kezindegi qıyndyq taǵy bar.
О́tken jyly AQSh úkimeti Shenchjen qalasynda ornalasqan Huawei kompanııasyn óziniń qara tizimine engizip, basqa elderge de Huawei-di kelesi býyndaǵy 5G jelisinen shyǵarýǵa qysym jasaǵan. Endi AQSh amerıkalyq tehnologııany qoldana otyryp jasalǵan Huawei ónimderin satatyn kez kelgen kompanııadan lısenzııa alýdy talap etip otyr. Kompanııa ókilderi keıbir chıp óndirýshileri lısenzııa alýǵa ótinish beredi dep úmittenetinin jasyrmady. Bul qıyndyqtarǵa qaramastan beısenbide Huawei óziniń Mate40 smartfondaryn tanystyrdy. Qytaılyq kompanııa óz óniminiń Apple-niń sońǵy smartfonyna qaraǵanda kúrdeli prosessormen jabdyqtalǵanyn málimdedi.