Bul kúni Semeı qalasyna qarasty Qaınar aýylynyń balalary alaqaılap qýandy. Qýanbaǵanda, ortalyqtan jyraq jatqan aýylda zaman talabyna saı «street workout» ashyldy. Qarapaıym tilmen aıtsaq, ashyq aspan astyndaǵy sport alańy.
Jer-jerlerde buqaralyq sportty damytý týraly el Prezıdenti Qasym-Jomart Toqaev halyqqa Joldaýynda: «Buqaralyq sportqa, dene tárbıesine jáne balalarǵa basymdyq berý kerek. Ár oblysta, iri aýdan ortalyqtarynda sport úıirmelerin ashý qajet» degen edi.
Al Qaınar aýylynyń balalaryna qýanysh syılaǵan abralylyq soǵys ardageri Qaırolla Bazilbekulynyń urpaqtary edi. Olar «Týǵan jerge taǵzym» aksııasy aıasynda jas órenderge salamatty ómir saltyn ustansyn degen nıetpen sport alańyn salyp berýge úlken úlesterin qosty.
– Aýylymyzǵa qaladaǵydaı «street workout» salynǵanyna rızamyz. Balalar ýaqyttaryn tıimdi ótkizý úshin jasalyp jatqan múmkindik bul. Bárimizge qýanysh syılaǵan demeýshiler áýletine raqmetimdi aıtamyn, – deıdi mektep oqýshysy Nafısa Serikqalıeva.
Qaınar aýylynyń ortalyq kóshesinen ashylǵan sport alańyna tennıs ústeli, túrli týrnıkter qoıyldy. Kelesi jyldary «street workout» áli de keńeıe túsetin kórinedi. 337 úıli aýylda sonymen qatar fýtbol alańy, mádenıet úıiniń ishinde trenajer zaly bar. Voleıbol, basketbol jaqsy damyp keledi. Jas jattyqtyrýshy Ernur Alymjanuly basketboldan úıirme uıymdastyryp, keleshek sportshylardy shynyqtyryp júr. Aldaǵy ýaqytta kúresten de seksııa ashylýy múmkin.
Shyǵys Qazaqstan oblysy
Qaınar aýyly