Densaýlyq saqtaý mınıstri Alekseı Soıdyń tóraǵalyǵymen qoǵamdyq baqylaý ókilderimen selektorlyq keńes ótti.
Densaýlyq saqtaý mınıstri atap ótkendeı, koronavırýs ınfeksııasy búkil álemdegi densaýlyq saqtaý júıesine úlken aýyrtpalyq túsirdi. Qalyptasqan jaǵdaıǵa baılanysty óńirlerde volonterler qoǵamdyq baqylaý tobyn quryp, birneshe aı densaýlyq saqtaý, bilim berý obektileriniń jáne qoǵamdyq oryndardaǵy sanıtarlyq normanyń saqtalýyna monıtorıng júrgizip, kómektesip keledi. Sondaı-aq óńirlik úılestirýshiler gýmanıtarlyq júkterdi qabyldaýǵa, ony bólýge belsendi qatysady.
383 volonter 3 aı ishinde Qazaqstannyń 17 óńirinde 4 300-den astam monıtorıngtik is-shara ótkizdi. Olar gýmanıtarlyq júkterdi qabyldaýǵa kómektesti, adam kóp jınalatyn oryndarda monıtorıng júrgizdi, sanıtarlyq normalardy buzǵandarǵa qatysty azamattardan túsken shaǵymdarǵa jaýap berdi, densaýlyq saqtaý jáne bilim berý obektilerine monıtorıng jasady.
«Áleýmettik jelilerdegi monıtorıng qoǵamdyq baqylaý volonterleri halyq arasynda joǵary bedelge ıe ekenin jáne jurt olardyń qyzmetine senim artatynyn kórsetedi», dedi A.Soı.
Sonymen qatar búginde qoǵamdyq baqylaýdy úılestirýshilerdiń memlekettik organ ókilderimen, ásirese óńirlermen baılanysta birqatar qıyndyq bar. Qoǵamdyq, ákimdik, sanıtarlyq-epıdemııalyq qyzmet pen IID arasynda naqty ortaq úılestirý joq. Keıbir oblystarda jergilikti atqarýshy organdarmen qoǵamdyq baqylaý tobynyń ózara is-qımyly formaldy túrde ǵana.
«Osyǵan baılanysty biz qoǵam ókilderi men memlekettik jáne jergilikti atqarýshy organdar arasyndaǵy ózara yntymaqtastyq pen úılestirýdi retteýimiz qajet», dedi mınıstr.
Kezdesý barysynda qatysýshylar joǵaryda atalǵan máselelerdiń sheshimine qatysty pikir almasty. Densaýlyq saqtaý mınıstri óńirlerdegi densaýlyq saqtaý basqarmalarynyń basshylaryna qoǵamdyq baqylaý múshelerin qoldaýdy jáne olarǵa qajetti kómek kórsetýdi tapsyrdy.