20 qarashada Almatyda otandyq "Nev Names" jáne "Daryn" promoýterlik kompanııalarynyń uıymdastyrýymen kásipqoı bokstan halyqaralyq týrnır ótti.
Keshtiń basty jekpe-jeginde qazaqstandyq Ashat Jantursynov pen ázirbaıjandyq Tarýel Jafarov kúsh synasady. Bul sportshylardyń ekeýi de osy kúnge deıin jeńilistiń kermek dámin tartqan emes. Tanymal bapker Saǵatbek Musahanovtyń shákirti bes kezdesýdiń tórteýinde aıqyn basymdyq tanytsa, Qap taýy ókili alty básekeniń barlyǵynda jeńiske jetti. Osy jekpe-jekte WBC nusqasynyń aımaqtyq deńgeıdegi altyn belbeýi sarapqa salynady.
Sondaı-aq, Almatydaǵy jarysta birqatar shet memleketterden kelgen tanymal bylǵary qolǵap sheberleri jáne Eskendir Harsan, Bekbolat Quramysov, Baýyrjan Beıildınov jáne taǵy basqa saıypqyrandar óner kórsetedi dep kútilýde.
– "Daryn" promoýterlik kompanııasynyń tusaýy kesilgenine eki aıǵa jýyq qana ýaqyt boldy. Osyǵan deıin biz Saǵatbek Musahanov jetekshilik etetin "Nev Names" kompanııasymen birge Almaty bir jarys ótkizip úlgerdik. Bul jarystyń deńgeıi kópshiliktiń kóńilinen shyǵyp, osy salanyń basy-qasynda júrgen mamandar tarapynan joǵary baǵalandy. Osy joly da tájirıbeli sportshylarmen qatar daryndy jastardyń basyn qosýdy jón kórdik. Buıyrtsa, 20 qarashada ótetin týrnır de tartysqa toly bolmaq. Sóz oraıy kelgende, bizdiń bul bastamamyzǵa jan-jaqty qoldaý kórsetken respýblıkalyq kásipqoı boks federasııasy, "Abylaı han" sport klýby, Shyǵys Qazaqstan oblysy Jarma aýdanyna qarasty Kóshek aýylynyń azamattaryna jáne jeke kásipkerler – Gúlnar Jaýynshynova men Gamza Geıdarovqa zor alǵysymyzdy bildiremiz, deıdi "Daryn" promoýterlik kompanııasynyń prezıdenti Darhan Qabylanbaev.