Elimizdiń 17 óńiriniń qatysýshylarymen ótkizilgen onlaın-dıalog alańynda Qazaqstanda áleýmettik kásipkerlikti damytý máseleleri talqylandy, dep habarlaıdy Egemen.kz mınıstrliktiń baspasóz qyzmetine silteme jasap.
Kezdesý barysynda áleýmettik kásipkerdi anyqtaıtyn normalar men ólshemderdi zańnamalyq deńgeıde engizý, osy baǵytta oqytý is-sharalaryn ótkizý, jańa formattaǵy bıznesmenderge syılyq berý arqyly qoldaý jóninde usynystar aıtyldy.
Alań aıasynda tabysty áleýmettik kásipker, "Green Tal" áleýmettik sheberhanasynyń negizin qalaýshy Emın Áskerov moderator retinde sóz sóıledi. Sondaı-aq, "Ortalyq Azııanyń Eýrazııa" qory ókili Aıgúl Taǵatova, "Impact Hub Almaty" quryltaıshysy Indıra Shah, Qazaqstannyń áleýmettik kásipkerler qaýymdastyǵynyń prezıdenti jáne "Eldanı" qoǵamdyq qorynyń dırektory Gúlzıra Amanturlına, "Radost" qaıyrymdylyq dúkeniniń negizin qalaýshy Merýert Argımbaeva, "Generation" qoǵamdyq birlestiginiń negizin qalaýshy Vladıslav Golıarko, ekologııa salasyndaǵy áleýmettik kásipker Mıras Abbasov jáne basqa da sarapshylar óz usynystaryn belsendi túrde bildirdi.
Spıkerlerdiń aıtýynsha, osy salany damytýdyń negizgi problemalary: áleýmettik kásipkerler úshin biryńǵaı platformanyń bolmaýy, memleket tarapynan áleýmettik kásipkerler úshin preferensııalardyń bolmaýy, sondaı-aq aqparattyq jarııa etýdiń jetkiliksizdigi.
Aıtylǵan usynystar Qazaqstan Respýblıkasy Parlamenti Senatynyń depýtattary bastamashy bolǵan áleýmettik kásipkerlik máseleler jónindegi zań jobasynda kórinis tabady.
Esterińizge sala keteıik, atalmysh salada pármendi usynymdar ázirleý úshin osyndaı dıalog alańdary "Áleýmettik kásipkerlikti damytý áleýetin zerdeleý jáne ony damytýdyń negizgi ádistemelerin ázirleý" zertteýi aıasynda, QR AQDM bastasymen ótkizildi.